قريب الباشا 23 “الزنزانة”…
تأليف : محمد كسبه
قريب الباشا “٢٣ “
الزنزانة
تأليف : محمد كسبه
المعلم شرف في مركز الشرطة الأمن يفتشه و يأخذ منه المحفظة و المحمول .
- يا شاويش علي دخل الزبون ده العنبر .
- العنبر اهني فيهم يا حض الصول ؟
- عنبر المعلمين .
- انجر قدامي يا مجرم .
- طب بس سيب الجلابية كده .
الشاويش علي يفتح العنبر و يقول : ادخل مع زمايلك .
و يغلق الباب . - المعلم شرف : سلام عليكم يا رجاله .
- أحد المساجين : تعالى اقعد ، إنت جاي لوحدك ولا مع حد .
- لا سيدي جاي لوحدي .
- ممسوك في إيه ؟ قتل ولا سرقة و لا اغتصاب .
- اني ممسوك مخدرات .
- مهو شكلك كده برضه .
- اتكتم ياض بدل ما أخد فيك تأبيدة .
- مسجون آخر : طاب ممعكش سيجارة مغمسة يا معلم .
- هو إنت حمار مبتفهمش ، أنا لسه ممسوك طازة و خدوا كل إللي معايا ، حتى علبة السجاير .
- و اتمسكت إزاي يا معلم .
- أبدا ولاد المتدايقة عملولي كمين .
- احكي يا معلم ، إلا هو إنت اسمك إيه ؟
- اسمي المعلم شرف .
- بس إنت مش باين عليك الشرف أبدا .
- ياض اتكتم خلي ليلتك تعدي ، بدل ما أعورك .
- طاب بس هدي أعصابك يا معلم ، و خد ولع دي .
- هات يا عم دنا خرمان بقالي ١٠ ، ١٢ ساعة في تحقيقات و حجز و بهدلة .
- إيه إللي حصل يا معلم .
- صلوا ع النبي .
- احد المساجين : نصلي ع.النبي ليه يا معلم ، هو إنت هتحكي لنا قصة دينية ولا هتفسر لنا آية .
- احد المساجين : ياد بطل بقى الله يخرب بيتك سيب المعلم يحكي .
- قول يا معلم .
- الواد حسونه غاب يوم عن القهوة .
- حسونة مين ؟
- الصبي إللي شغال عندي .
- و بعدين .
- أنا فكرته تعبان ولا عيان ولا حاجة و لا التليفون إتسرق منه ، هو مكانش بيرد علطول ، لكن مرة واحدة كده رد و قالي إن كله في التمام و التليفون كان وقع منه و كان بيتصلح و قال إن أبوه تعبان و هو معاه في المستشفي و لما أبوه يفوق من التعب هيجي .
- بيني و بينكم أنا الفار لعب في عبي ، خصوصا إنه استلم البضاعة من المعلم سين .
- مين المعلم سين ده يا معلم ؟
- أهو أي حد إنت باين عليكو بتجرجروني في الكلام .
- لا يا معلم كلنا هنا ممسوكين مخدرات ، خلي بالك هما بيحطوا الناس النضيفة مع بعض .
- إيه يا ياله هو حد بيخش هنا نضيف .
- ايوه يا سيدي يعني مثلا اتنين متخانقين و شاكين بعض هيتحطوا معانه هنا ليه ؟
- آه واحد عليه وصل أمانه هيتحط مع بتوع المخدرات ليه ؟
- يعني الدار أمان .
- لا متخافش كمل يا معلم .
- المهم سألته في التليفون على مكان البضاعة .
- قالي أنه جابها في نفس اليوم و حطها في المخزن من يوميها .
- من باب الإحتياط روحت أجيب البضاعة بعد الفجر ، أنا قولت ده الوقت المناسب خصوصا كله بيكون نام ، أو راح ينام .
المهم دخلت جبت البضاعة و أنا طالع اتقبض عليا معرفش إزاي مع إني لا قولت لحد ولا عرفت حد . - يا معلم هما كانوا اكيد مراقبينك طول الوقت .
- اهو ده إللي حصل .
- وهتعمل إيه ؟
- لسه مش عارف .
- احد المساجين : بص يا معلم أنا هديلك اسم محامي متخصص في القضايا دي و بيكسبها علطول محامي ابن حنت.
- اسمه إيه ؟ و مكانه فين ؟
- اسمه م .ع في الجنة الفلانية .
- احد المساجين : بس ده الفيزيتا بتاعته غالية شويتين .
- بياخد كام يعني .
- ٣٦ باكو .
- ياااااه ٣٦ باكو ليه ده كتر قوي ؟
- هو كده .
- يا جماعة عايزين ننام اسكتوا فاضل ساعتين و هنتعرض ع النيابة بكره الصبح .
- هنتعرض ع النيابة الصبح بسرعة كده .
- آه يا سيدي حاول تريح نفسك ساعة ولا اتنين و أفطر كويس لأن يوم النيابة طويل .
- المعلم شرف : هاتفها جمايل يا رب دنا عيالي لسه صغيرين .
- ياخي ماتربيهم بالحلال .
- اسكت ياض لأضربك إنت باين عليك لا بتاع مخدرات ولا نيلة شكلك مخبر ياض .
- احد المساجين : هوس كله يسكت عايزين ننام ، إحنا هنركب عربية الترحيل بكره الصبح….. لا كمان ساعتين .
- امين عمر خد المتهم ده دخله عنبر المعلمين .
- بس يا حض الصول ده عنبر بتوع المخدرات !!!!
- و احنا هنعمل إيه مفيش مكان ، كل العنابر عندنا كومبليت ، و بعدين ده كلها ساعتين و النهار يطلع و كلهم هيتزحلقوا ع النيابة .
- تعالى يا عوض معاك إيه ؟ لازم تتفتش
- فتش براحتك ، أنا معاية المحفظة و المحمول .
- طاب هات الخاتم إللي إيدك ده كمان .
- يفتح باب العنبر .
- إدخل يا عوض .
- المساجين : يا أمين عمر هات لنا نص شاي .
- النص شاي ب ١٥ جنية .
- طاب ماشي هات يا عم ب ١٥ ب ١٥ ماشي .
- المعلم شرف : يعني إيه نص شاي يا جماعة .
بعد ١٠ دقايق من فتحة صغيرة في باب العنبر الحديد . - الأمين عمر : اسحب الخرطوم ده عندك و حطه في القزازة البلاستيك و أنا هفضيلكم الشاي من البراد في القمع و منه للخرطوم و هوب للقزازة إللي معاكم .
- ماشي يلا صب الشاي في الخرطوم .
- المعلم شرف : إيه ده يا عم عمر ده شوية صغيرين ، هو نص شاي يعني تملا نص الزمزمية .
- يلا يا جماعة كل واحد ياخد شوية في الكوبابة البلاستيك إللي معاه .
المساجين بيشربوا الشاي . - أومال يا عوض , إنت جيت هنا بتهمة إيه ؟
- لا تهمه ولا غيره ، دنا إللي اتصلت بشرطة النجدة .
- ليه يا عوض إيه إللي حصل .
- أنا كنت سايق العربية النص نقل و محملها اتنين طن رز شعير ، و كنت سايق عشان اوصل الطريق الرئيسي .
- لقيت أصحاب الأرض طالعين عليا بالنبابيت و عايزين يكسروا العربية ، حاولت افهم منهم إيه إللي حصل .
اتاريهم متخانقين مع الجماعة إللي أنا شايل الرز من عندهم ، لأن الطريق ده من أرضهم و بتاعهم و التانين مرضوش يسيبوا حته من أرضهم في الطريق ولا حتي راضين يدفعوا تمن نص الطريق يعني مش راضين يشاركوا في الطريق بحته من أرضهم ولا راضين يدفعوا للناس تمن نص الطريق عشان يعدوا و عايزين يخلوه طريق عمومي . - ك
- طاب إنت عملت إيه .
- انا قولت لهم ارجع بالعربية لورا تاني مرضوش ، طاب أطلع قدام مرضوش برضه .
- اومال إيه إللي يرضيهم .
- كانوا عايزين يا سيدي ياخدوا الحمولة إللي على العربية كلها .
- قولت لهم إنت كده مش اصحاب أرض ده إنتوا كده قطاع طرق .
- كويس إنك قولت لهم كده .
- كويس إيه ، دنا لما قولت كده و عينك ما تشوف إلا النور و هاتك يا ضرب .
- بعد ما خلصوا ضرب اتكومت على بعضي في حته و طلعت التليفون و اتصلت بشرطة النجدة ، خدوا بياناتي و عملولي محضر .
و بعد نص ساعة جات عربية المركز وهما إللي طلعوا العربية و حطوها هنا في الحضان لحد القضية ما تخلص . - كويس انك اتصرفت كده ، جدع يا عوض .
- جدع إيه بس ، ده أصحاب الأرض أنا شاكيهم أنهم قطعوا عليا الطريق ، و هما شاكيني إني سارق الرز من عندهم .
- احد المساجين : بص يا عوض إنت هتجيب محامي و هم هيجيبوا محامي و تقعدوا مع بعض و تتصالحوا .
- يعني أنا راجل على قدي و شغال سواق باليومية اخش في مشكلة مليش ذنب فيها و ادفع للمحامي كمان .
- طاب وأصحاب الرز فين من الموضوع ده .
- اصحاب الرز شاكيني راخرين بسرقة الرز و إني موصلتش الحمولة لمكانها .
- طاب وهتعمل إيه يا عوض .
- ربك أعلم بلي هيحصل .
الأمين عمر يخبط على أبواب العنابر . - كله يصحا ، كله يجهز نفسه ، يفتح باب العنبر يا معلم شرف تعالي استلم .
- استلم إيه ؟
- الفطار .
- احد المساجين : ظبطه بعشرة جنية عشان يزود لنا الأكل .
- خد يا عم الأمين أحلي عشرة جنية .
- انتو كام واحد هنا ؟
- ٧ انفار
- خد يا معلم أدي ١٠ أرغفة و ١٠ حتت حلاوة و ١٠ جبنة مثلثات .
- طاب هات لنا نص شاي بس بسرعة .
- ماشي بس روقوا العنبر بسرعة عشان تترحلوا بدري
- هنترخل نروح فين يعني ؟
- هتتعرضوا على النيابة .
التعليقات مغلقة.