قسمونا … رضا أبو شنب
قسمونا وبهدلونا
لما طمعو في ورث ابونا
حتي فرن البيت خدوه
وقفونا علي الطابونه
لما قلنا ولسه ايه
قالو سيبنالكو الصابونه
للي عايز يبقي بيه
واللي يعصر 100 لمونه
/
قسمونا وفرقونا في المكان
والفيران طلعت علينا
وفي ايديهم الميزان
حته ليكي وحته ليا
وندي حته للشيطان
لما يرضي بالهدية
البلاد تبقي في امان
والكراسي هي هي
هي عزبة من زمان
للي ياكل في التكيه
واللي عايش بالضمان
واللي يعمل تمثليه
ينشغل بيها الجيران
واحنا تحت البطانيه
مرتاحين جوه الحيتان
نبقي في أيديهم ضحيه
يدبحونا في الميدان
والحكايه مش قضيه
هي نفس التمثليه
لما بنعيب الزمان
عينونا بالماهيه
واحنا أصحاب المكان
يرفعولنا البندقيه
واحنا نجرى علي الادان
يدفنونا في التكيه
والعزا عند الجيران
زينا زي الولية
اللي ماتت من زمان
/
قسمونا وبهدلونا
فرقونا في كل وادي
قسمو كل الاراضي
غصب عنا وقلنا عادي
مالسويس بتحب تسكن
في المعادي
والغريب بيسيب بلاده
وتحضنه دايما بلادي
والبلاد فاضيه بتصرخ
فين ولادي
ليه سابوني للاعادي
قسمونا لالف ملة
اللي شيعي واللي سنه
واللي حتي ملهشي ملة
دخلو في الدين مشايخ
موتو كل الائمه
اللي شارب واللي دايخ
واللي يفتي بكل زمة
واللي بيولع حرايق
واللي لابس الف عمة
زورو كل الحقايق
كدبو علم الاجنة
لو تحب تعيش منافق
خلي كدبك يبقي سنه
قول تمللي انك موافق
والحياة راح تبقي جنه
تبقي للسلطان مرافق
والايدين مليانه حنه
والحياة صبحت مملة
للي عايش فيها ميت
واللي بيقضيها شمه
واللي ساكن في المقابر
والحيطان بتضمه ضمه
كان بيصرخ او ينادي
نفسي اشوفك تاني يامه
نفسي اشوفك يا بلادي
لما تبقي خير امه
قسمونا وكنا لمه
كنا وسط الكون ائمه
التعليقات مغلقة.