قصر حبك …بقلم وحيد علي الجمال…
لو فشلت في مرة صدفة
أو وقعت في قلب حفرة
حد قاصدك قام و زقك
غصب عنك أو بخاطرك
لو مكايدة أو مصادفة
عادي جدا شئ طبيعي
كلنا في الدايرة واحدة
لو أساسك كان متين
واللي رباك عنده دين
وقعتك هتقوي قلبك
والوجع يصلب في ضهرك
لو دخلت في حرب غيرك
هي أصلا مش بتاعتك
هى مفروضة عليك
عكس ما ربيت ضميرك
شفت فيها م القذارة
والندالة والحقارة
شك ظنك صار يقين
والشمال من غير جدال
زي أنفاس السيجارة
راح تشوف دمعك سجين
صرختك وفي عز ضعفك
في السما هتكون سبيلك
و البشارة راح تجيلك
بالحقيقة في خط سيرك
تفتح الباب الكبير
يوسف الطفل البريء
خرجوه م البير عزيز
كام عزيز مر في حياتك
كانوا شهد الروح عزاز
فجأة لما احتجت ليهم
سقطوا من أول سؤال
قصر حبك كان إزاز
شرَّخه من عطسة سعال
لاحتياج مش كله مادة
كنت محتاج المودة
اللي لمستها خيال
بس قبل الليل مايرحل
بشكرك جدا يا شدة
ياللي أكتر واحدة شاهدة
قد إيه طعم الخسارة
كنت بمضغها بمرارة
مش بكتر اللمة يا اهبل
تتحسب بينكوا الغلاوة
الفشل له أب واحد
والف أب لكل ناجح
……وحيد علي الجمال………
التعليقات مغلقة.