قصيدة الحلاق …
رضا علي أحمد أبو شنب
قصيدة (الحلاق) زجل
للحلاق في بلدنا حكايه
عامل فيها ياناس دكتور
مرة يولد بنت الدايه
ومرة بيعمل فيها طهور
فوق البدله تلاقي عبايه
عامل فيها الشيخ مشهور
عامل زي الواد حدايه
لما بيشرح في الدستور
كلمة ويعمل منها جناية
يعمل نفسه كمان مكسور
يمسك سبحة ويقرا الايه
وقت الجد بيشهد زور
كل ما بمشي بيمشي ورايا
عايز يعرف ايه بيدور
حشري وزارع نفسه معايا
لازم يمضي معايا حضور
ساب القصة وحط روايه
علشان ياخد هو الدور
لما نقوله ياعم كفاية
كان بيطفي علينا النور
للحلاق في بلدنا حكايه
عامل فيها ياناس دكتور
****
تدخل عنده تلاقي مرايه
جايبة البيت ومعاه السور
جايبه محمد في الوسعايه
كان بيلف وكان بيدور
جايبه الست ولابسه ملايه
رافعه ايديها وماسكه ساطور
جوزها وراها واخدها حماية
خايف يجي عليه الدور
راسه بتخبط في الطفايه
يطلع يجرى علي المامور
اصل صاحبنا واخدها هوايه
دايما يكشف في المستور
واللي بيسرق من العنابية
واللي يقلب في الجمهور
واللي بيشرب في الكباية
واللي بتنده علي الحنطور
يحشر نفسه في كل حكاية
يمضي بايده علي المنشور
للحلاق في بلدنا حكايه
عامل فيها يا ناس دكتور
***“
لما بيحكي في اي قضايا
بالتفاصيل بيجيب السور
يمسك بس في اي بدايه
يعمل منها يا ناس منشور
ليه الساقيه تلف معايا
ليه الارض تمللي تبور
كنت بسيبه يعيش جوايا
كان بيولع ليا بخور
لو تعبان خدلك حبايه
وانت هتصبح زي الطور
او محسود هكتبلك ايه
كان بيقولها الشيخ منصور
كنت بوطي واسيبله قفايه
يطلع ينزل مش محظور
واهرب منه علي الدفايه
اصل البرد في ايده طهور
للحلاق في بلدنا حكايه
عامل فيها يا ناس دكتور
التعليقات مغلقة.