قصيدة القدس أحمر خطّها بقلم الشاعر المصري أحمد إبراهيم النجار
15/5/2021
تحيا القدس عربيه
قالوا شلوم
قولت فين معني الحروف؟
والقتل فن بيترسم
بين الصفوف
قرّب وطبّع للصهاينه
اسجد واركع
حب أكتر
واوعاك تشوف
خليك حمار او حتى فار
ده العار أمان والعرش نور
والحلم كان
حبة بنود ع المكشوف
اكون حاميك من كل شئ
غمض عنيك واشرب خمور
وعيش جبان وادفع فلوس
نفّذ قرار واحنّي الرؤوس
ده القدس حلم كان سراب
والأرض ملك لليهود
كنعان مالوش حق المكان
وامحي التاريخ واشطب زمان
لما هارون وبعده موسي اتولد
وعاش ومات
على ارض سينا من زمان
سيدنا ابراهيم
كان ف العراق كان موطنه
كنعان وعاش من قبلهم
اشطب تاريخ زيّف تاريخ
وامحي الزمن
وعيش حمار
والفجر زور
طالع كئيب اسجد وبوس
أيد الصهاينة المجرمين
والدين طقوس
حبة لصوص سارقه التاريخ
والقدس أحمر خطّها
واوعاك تدوس
او يوم تدنس أرضها
هتعيش فى خوف
ملعون جبان لما الطوفان
ياخد بواقي حلمكم
والحلم وهم بتحلموه
أرض الميعاد
هتكون مقابر فجُركُم
وظلمكم وعجزكم
والعار ملاحق كل اصحاب
العروش والكروش
عشقة الكراسي ومجدها
والعرش زايل مهما طال
بيه الزمن
الله اكبر من صهاينه مجرمين
الله اكبر من بغال مستعربين
الله اكبر يا عرب
الله اكبر يا فلسطين
بقلم الشاعر المصري أحمد إبراهيم النجار
التعليقات مغلقة.