قصيدة انا والشوق بقلم : باسمة إبراهيم
أنا و الشوق بنستنى
هوانا لما راح و لا جاش
يجوز انه صبح ناسي
و لكن إحنا ما بننساش
و نتمني نشوف بكرة
بعين الدمع ما عرفهاش
ونتحايل علي الذكري
تعود تاني و ما تسيبناش
أمانة يا صبر لازمني
طويلة رحلة الأيام
منايا ف فرحة لو مرة
تجيني حتى لو في منام
يروح لبعيد و بيسيبني
و يبقي هو و المكتوب
يبات الحب متحيَّر
لا هو غالب و لا مغلوب
و يفضل بينَّا كام دمعة
و كام آهة على اللي راح
و عمر يدوب كما الشمعة
و يتبدل غنايا نواح
و أيامنا تطول بينا
يزيد شوقنا كمان و كمان
و راحة القلب تنسانا
و تطول رحلة الأحزان
و نسمع للفراق سيرة
ويملي حياتنا بالحيرة
و يسكن دمعنا عنينا
ندوب كالشمع م الغيرة
تعالى و قصَّر المسافات
ما انا أصلي ما ليش غيرك
و ضيف الفرح للحكايات
ما دام حبي غنا طيرك
ليلاتي ياقلبي انا باشوفَك
فارش سكتي أحلام
و تقول انسي بقي خوفِك
و حلي مرارة الايام
باسمة
التعليقات مغلقة.