قصيدة جوايه خيمة عزا بقلم أحمد إبراهيم النجار
مليون تمن بين
الزمن مدفوع
وانا ريقي ناشف عطش
بين فك غول مفجوع
جسدي الضعيف محني
بجمع فتات م الجوع
يا دنيا فيكي العجب
نورك ضلام بقي ليل
جوايه خيمة عزا
باكيه الجراح م الويل
والغول لقوتي أمتلك
واخد معاه الخير
وطفلي لما صرخ ل
طمه فى وشه سكات
ممنوع فى يوم تصرخ
او تنزل الدمعات
واسكت بلاش الصوت
لتبقي م الأموات
الغول عنيد وجعان
حابب تكون عطشان
ساجد بكل خضوع
أرقص وغني بجوع
مليون تمن
بين الزمن مدفوع
وانا ريقي ناشف عطش
بين فك غول مفجوع
المجد كل المجد
لغول مالوش ولا قلب
حابب يكون مدرسة
ع الظلم متأسسه
وكله عيشه بموت
جامع فتات القمح
قاطف فى شجر التوت
مانع مناحل عسل
شارب خلايا العسل
وغنّي قول توت توت
وغني غنوة موت
فى صمت مش بالصوت
الصوت كمان ممنوع
أرقص وغني بجوع
مليون تمن
بين الزمن مدفوع
وانا ريقي ناشف عطش
بين فك غول مفجوع
ده حلم ولا كابوس؟
ده وعد كان منحوس
فى رحلة الأيام
فيها الفجور فى طقوس
والمجد كله لجان
عفريت بيتشكل
فى كل صورة ولون
ضاحك كما المجنون
ينصب طقوس وطقوس
ويرتل الكلمات
بدون لا شكل ولون
وينفخ البلون
وتبدأ الحضرة
وسط الأراضي البور
ناشفه بلا خضرة
وسط الدروب السود
مكسيه بالضلمة
وأرقص وغني بجوع
مليون تمن
بين الزمن مدفوع
وانا ريقي ناشف عطش
بين فك غول مفجوع
جسدي الضعيف محني
بجمع فتات م الجوع
بقلم الشاعر المصري
أحمد إبراهيم النجار
بتاريخ 15/7/2021
التعليقات مغلقة.