قصيدة “ضاع شروقي ” بقلم الشاعر المصري أحمد إبراهيم النجار
اوعديني لما قلبك يوم يغني
افتكري اني
كنت واحد حب نورك
لون ورودك ريح عطورك
والسواقي الدايرة بين
بين غيطانكٍ وسط نارك
فى شمالك وف جنوبك
اوعديني لما اسافر او اهاجر
يبقي قلبك ليا فاكر
اني كنت ف يوم شروقك
كنت نبضك اللى نابض
كنت نور كاسي ف عيونك
كنت واخد من فصولك
كل شئ
من ملامحك كل شئ
قمحي لوني كان فى لونك
في غيابك او ظهورك
كنتى حلمى المستحيل
كنت انادي امد ايدي
طول سنيني المزروعين
فجأة منى ضاع شروقي
وعيوني مدمّعين
من غروبك وف دروبك
رحلة الجرح الطويل
واه يا ملكّه قلبي مني
لسه فاكرك لسه حسّك
لسه حبّك لسه شوقك
مهما ابعد عن غروبك
لسه عايش بين ماضيكٍ
مهما كان الماضي قاسي
قلبي مش ناسي عيونك
والرموش متكحلّين
والضفاير كاسيه توبك
بالجمال مفرودين
وف خدودك نور ضياكٍ
برغم الليل اللى راسم
فوق جبينك قسوة
الماضي الحزين
اوعديني تكتبيني بين كتابك
بين ميدانك فوق ترابك
انى واحد عاش ينادي بقلب حبّك
إنى عاشق سحر عينك
والرموش عاشق لحسنك
بس كنتى قفله بابك
اوعديني تكتبيني
في شهادة الوفاة بالشهيد
اللى عاشلك واللى ضاع
في دروب نيرانك
بس عمره ف يوم ماخانك
اكتبيني في شهادة الوفاة
بالشهيد اللى حبّك واللى صانك
اوعديني تكتبيني
لما تطلع روحى فوقي
لما اصبح يوم شهيد
بقلم الشاعر المصري أحمد إبراهيم النجار
التعليقات مغلقة.