قصيدة( ظروف وحروف)…
بقلم الشاعر المصري ..احمد إبراهيم النجار
بتاريخ 4/11/2020
وانا العازف على الاوتار
بجمرة نار بتحرقني
اعيش الوهم في هواكي
واندهلك وما تردي
واتقلب على جمري
واعيشك حلم مش مكتوب
ولا مرغوب
ربيع الورد ليه عطشان
وليه مكتوب يموت حبي
وبتقولي ظروف مانعه ؟
عجاف في سنين
يضيع الوقت يدبل يوم
واعيش ف هموم
وتسكن دمعه على خدي
وتصرخ خطوة مشلولة
ويسقط حلم من عمري
وبتقولي ظروف مانعه ؟
لا يوم الخطوة تجمعنا
ولا هنعيش وطير مجروح
ومتقصقص جناحه الريش
وليل ساكن على بابي
في لحظة خوف
وبتقولي ظروف مانعه ؟
يا طول صبري وأحلامي
ضياع عمري وايامي
ياريت كنتي سراب أحلام
ولا رحلة في احزاني
ياريت بابي ما كان مفتوح
ولا سكنتي في احضاني
بالهفه وشوق
وبتقولي ظروف مانعه ؟
هنتفارق وليه سبتيني
اتمني واتمني واتمني
وانا غارق في بحر النار
واصرخلك وانا فارد
جناح شارد
في وسط نيران
وانا انسان ومش مارد
ولا قادر عبور النار
ولا راسم طلاسم زار
ولا عايزك تقولي ظروف
وعاش الخوف على بابي
طويتك قصه في كتابي
وعنونها ظروف بالخوف
بقلم الشاعر المصري/احمد إبراهيم النجار
التعليقات مغلقة.