قصيدة ياااه شعر حسن أبو عرب
يااه على دنيا مبترحمش
ناس مرتاحه وناس متنامش
ناس بتدوب من نظره وهمسه
وناس مسعوره مبتفهمش
ياااه
يااه ياسنين العمر جريتى
لا بترحمى ولامره هديتى
دايما تخدى وامته عطيتى
ياااه
يااه ياسنين العمر يادايسه
ضاربه غلابه وأغنيا بايسه
واحنا مطايا وانتى السايسه
يااه
على ماضى وذكرى جميله
غابت شمسه وملناش حيله
فين اللمه وفين العيله
يااه على حاضر ماشى بالتيله
ياااه
يااه على ابويا وخالى وعمى
ياه على دعوه صابحه من امى
يااه على ناس رحلت من دمى
يااه على ناس كات شايله لهمى
ياااه
يااه على ماضي وذكرى جميله
غابت شمسه وملناش حيله
فين اللمه وفين العيله
ياااه على حاضر ماشى بالتيله
التعليقات مغلقة.