قطر العمر…
منصور عبد المقصود
……..
أدى ليلة كمان عدت
وقطر العمر بيسرسب
كتير أصحاب يفارقونا
نفارقهم
كتير بنقول وحشتونا
وواحشينهم
وتيجى الذكرى من تانى
نهنيهم
على العمر اللى بيفرفط
وأنا بحلم أكون فارس
وألم الخيط على دراعى
وايه الداعى
نعيش فى خصام و نتنافس
مادام القطر هيعدى
وبكرة الدمعة هتجيلك
وهتجيلى
يا ريتنى بقيت
وأنا امسحها
من عينك
بمنديلى
يا صاحبى
تعالى نتخاصم مع
الأيام
ونحلم انها دايمة
ونحرم قسوة الدنيا
من الضحكة
على الأحزان
تعالى ف همنا نضحك
وتحضنى
وإذا مليت فى يوم منى
فلا تلومنى
تعالى نقطع القضبان ونخفيها
بلاش العمر يسرقنا
تعالى نبكى دنيتنا
على الخير اللى كان فيها
التعليقات مغلقة.