قلبك بيسأل … بقلم / مصطفى كرم
نفسي أقولك حاجات كتير
بس خايف ما تفهميني
جوه مني احساس غريب
حاسس أنك بتملكيني
ليه بشتاق أسمع صوتك
وف غيابك صورتك تجيني
وأستنى ديما لحظة لقانا
عشان أقولك ع اللى كاويني
وأما أحس النبض زايد
أكتم صوته لتسمعيني
وأقوله إياك يعلى صوتك
أحسن تفارق ويزيد أنيني
بس إزاى أخفى وأداري
وكل حرف باين في عيني
أيوه أدمنت وجودك جنبي
يا نبض جوه الروح يحييني
جايز إني شوفتك حبي
ونبع غدير صافي بيرويني
أو صديق برتاح لكلامه
لكل عيوبي قوام يهديني
واللا تكوني أخت حبيبة
وقت الشدة قوام تواسيني
صدقيني صحيح مش عارف
إدماني ليك دا إيه دليني
أو سيبينا من المسمى
المهم قربك يرضيني
التعليقات مغلقة، ولكن تركبكس وبينغبكس مفتوحة.