“قلبى المتشعبط فيكى ” الى امى النائمه فى قبرها …بقلم اشرف الشناوى شاعر عاميه البرامون المنصوره

قلبى المتشعبط فيكى “الى امى النائمه فى قبرها …بقلم اشرف الشناوى شاعر عاميه البرامون المنصوره

طب اقولك ايه
وانا قلبى اتشعبط
فى هدومك
وانا كل مابغسل
روحى بالاقى
عيونك
وباحس بدفا
وفى قبرك
كل مازورك
واتكلم وارغى
كتير والضحكه
بتاعتك زى ماهيه
وباشوف طبطبه
والجرح بيدبل
م الحنيه
وباحس بصوتك
وسط ملايكه
بتندهى ليا
بالله وملامحك
لسه حافظها
وبالتفصيله
والحسنه فى وشك
زى ماهيه جميله
والضحكه اللى اتمنيتها
تملى اورثها
باى وسيله
طب اقولك ايه
وانا قلبى بدق
فى وسط حريقه
ماهو قلبك رغم الموت
لساه بيحاوط قلبى
فى كل دقيقه
وبيزرع فيه النور
من غير مايحس
بضيقه
م الواضح
ان الكون دا مزيف كله
وان انتى لوحدك
بس طلعتى حقيقه
طب اقولك ايه
وانا قلبى اتشعبط
فيكى بنيه بريئه
فاهجيلك يامه كتير
واشكيلك
واحكيلك يامه تحلى
مشاكلى باى طريقه

………………