قلبي نوحه صوته عالي …بقلم سيد جعيتم …جمهورية مصر العربية
قلبي نوحه صوته عالي
أنَّ جامد من جراحي
في نن عينه كان شايلهم
راضي منهم بالملامة
صعب لما الغدر منهم
يبقي باين جوه عينهم
ينكروا شوق السنين
والأنين من عيني طافح
وبعذابي فرحانين
خليتوا إيه
للي شامت
واللي فرحان فيه ولايم
ياما قالي غدارين
حتى لما دقت المر منكم
قلت مرهم سكر ودايب
قالوا بوحك ضعف منك
قلت بوحي لأني دايب
حتى لما شفت منكم عجايب
وقلتوا عايب
قلت برضو دول حبايب
ألف معبد بنيت عشانكم
وف هواكم كنت سادن
كنت كاهن
كان وضوئي لجل عينكم
ابقى طاهر لما اشوفكم
قالوا عني عربيد وكافر
والذنوب لزقوها فيه
والعيوب حتى المساخر
مع أن قلبي نضيف وطاهر
مش راح أرضى بتهمة باطلة
ولا هارضى بكلمة قاتلة
نصلها سكينة باردة
واندبح من غير أنين
والدمعة تنشف جوه روحي
ودمي يروي المدابح
ومين يا ناس يسمع لي بوحي
المصيبة بتبقي اكبر
لما تيجي م الحبايب
اللي هما حتة مني
دمهم جوايا ساري
واللي ياما اشتقت ليهم
واللي ياما شيلت عنهم
ولا مرة شيلت منهم
صدقوني ع الهجر قادر
أني أبعد عنكم وأسافر
لبلاد تشيل وبلاد تحط
الغربة ارحم من هواهكم
ملعونة تهمة بتقولوها
تحدفوها خنجر ف قلبي
ملعون هوايا وملعون هواهكم
التعليقات مغلقة.