قلب نضيف.. شعر..احمد التبينى
“كدبة إبريل”
ح اروضنى
وحأقفل جيبى بالترباس
وأطبل زى بعض الناس
وأشوف القطه عطشانه
وقرب موتها من جوعها
وأقول مُووووتى
تشاركى يوماتى ليه ف قوتى..
وح أظلم كل حقانى..بلا خيبه
ودايما ح أعمل العيبه
ومش ح أعفو..وانا القادر ..
وأخون اللى
زمان بكانى وظلمنى..واكون فاجر
وأبعتر لمه لميتها
وح أغدر باللى حبيتها..
وأبيع نفسى ..
وح أمنع نفسى تتصدق بكلمه حلال
وأضل جيرانى واخواتى وأكون مُحتال
وأبيع واخد تمن صاحبى..وأكون غشاش
ماعدش فيه شيء على رأيه خلاص ببلاش..
وأصاحب بس واد بكاش
يطبل لى
ويرمى من قصادى الناس..
ويفرش لى الطريق بلالين
أفرقع حد منى إتغاظ
عشان مِسكين..
وح أمسك رقبة المياس
ورايح جى بين الناس
يقولوا عنه دا الطيب
وهو اللى زمان هاننى وباعنى رخيص
حاربنى كتير قوى ف طيبتى..واكل العيش
ح أروضنى وأتغير..وحابقى خبيث
لكين ازاى ح أروضنى وأكون إبليس !
مانيش قادر..ومش ح أقدر
أنا إتعودت ع الطيبه
وعمرى ماأكون واحد غادر
وعمرى ماحعمل العيبه
وعمرى مااكون واحد تانى
أكيد دا حلم شَيطَانى..
يااما أنا كنت متبنج..
يااما كبرت وبخرف
وسِنى خلانى بهنج..
يااما عشان ماأنا شاعر..ودا اللى أكيد
قلت أكتب حاجه مش فيا
فى قصيدتى اغير العتبه
تعيشوا معايا فى الكدبه.. وف التهويل
كل اللى قُلته دا كان كدبه
كدبة إبريل
دانا حد أطيب م الطيبه
وله قلب نضيف
ماتصدقوش انى أتغير
ولا أكونش شريف
ويارب هزارى على قلوبكم
كان دمه خفيف
التعليقات مغلقة.