قميص مقلوب …بقلم وحيد على الجمال
منيش يوسف ولا يعقوب
ولا هقدر على غيابك
فأبكيكي واقول مكتوب
ولا حبك هكفر عنه بصيامي
اتوب وارجع في عصياني
واقول بكره هتوب تاني
ونفس الذنب يتكرر
كأنه طير بيتحرر
وانا جوه القفص مسجون
منيش زاهد ولا معصوم
ومن ساسي لحد الراس
انا كلي كاسيني عيوب
وكان الوعد نتقابل
وانا ماسك ف طرف الليل
قميص مقلوب
وخايف قلبي يحسدني
وانا جوه الوجع مغلوب
واحلامي رغم قلتها
بعيش فيها وانا مصلوب
بتفسيرها وتأويلها
وفي الآخر بتتحول
لخضة روح خانقها كابوس
وماشي لوحدي في الزحمة
بدندن فيك بكام غنوة
وكام كلمة على كيفك
أرددها مع طيفك
اقول خليك هنا شويه
وبسمع همسهم جنبي
اكيد مجنون
فراقك عني وغيابك
شبيه الموت
وعايش عمري بفراقك
كما المقتول
بردد جملتك ديما
انا ف حبك بعيش مفتون
حقيقي بجد صدقني
منيش هقبل يساوموني
ابيع حبك
ولو عشت الحياة بعدك
أسير مملوك
مفيش غيرك يحررني
انا في قلبك انا المملوك
التعليقات مغلقة.