كأنه شيطان … بقلم وحيد علي الجمال
خسرت معاه رهان قلبي
ودفتر فيه سبع احلام .
وكام عنوان لكام بستان
وكم كبير من الخذلان
ونفس الغلطة تتكرر
بسيب الحلم يتفسر
ويتمرر ويتفلتر ويتكرر
و يتصرمح مع التنجيم
ويرمي بياضة للاوهام
ما وشوشتش ودع بعده
ولا مرة في يوم بعته
لحد في يوم قلب وشه
بلاش تفرح كدا عافية
عشان الفرح يتحقق
لازم له شروط
وكام تعويذة مكتوبة
على اصغر جناح كتكوت
وكام نقطة لدم الحوت
وكيس فاضي من السلفان
عشان تملاه دموع تعبان
و بودرة صفره م العطار
تولعها مع الاشباح
وترسم حرف أو حرفين
على ضهر الأمل بالليل
تشعوذ حرفك الخارج
عن المألوف
وتغسل دمك المخطوف
لقتني في شرنقات الجهل
بدور ع النجاح السهل
دعيت سرب الحروف السمر
وانا قلبي بيتلظى مابين الجمر
وكان طلب الحضور طوعا
ولو رفضت يكون كرها
ولو بالأمر
عملت لنفسي مليون تست
عشان روحي تكون حضرة
وتاخد وقتها في الرسك
وادفيها في حضن المسك
فكلِّمت الهوى في السر
فطمِّنِّي وكان كداب
وأقسم لي بأن الحب
اللي كان بينا ملهش كتاب
رجعت وقفت في المحراب
وتوبت ساعتها من الاحلام
وقبل الفتوي ماتعدي على قلبي
عشان تعلن وبعد صيام
بأن الشاعر العاشق ماهش أواب
ولو عمل القصيدة حجاب
ولو كان فيها مليون باب
دموع الشاعر العاشق
دموع كداب
……..وحيد علي الجمال……..
التعليقات مغلقة.