كتبوا قصايد في الشهيد ياماا…بقلم مسعد البحرواي

وكأنه كان بيموت علشان نولول شِعر
من يومي بسمع جهاد بتنادي لـِ سلامه
وسلامه وسط التتار ..عايش يآسي المر
وكبرت وانا محتار بين عِلم علَّامه
وبِدْع أهل الشر
محكوم عليا انتظر دوري في دوامه
وأربي عبد الودود علشان يموت في السر
ويجيب نيشان ماتحس بيه نانا
ولا يتعمل له مقام جار جذع شجر الدر
الحيره نار والنفس لوامه
والفكر في استعمار بيكلبشوه في الصخر
سوق النخاسه طفح وانا ذنبي ايه يا نا
ادفع تمن للكفن علشان لـِ كبدي يصُر
واسمع حكاوي وغناوي خلق شتامه
سايقين هبلهم و فوق طموحنا يفُر
مات الشهيد والبت مرجانه
لساها جاريه لإمام ….كان عبد أصبح حُر
‏
‏ياعروبه دم الشهيد لا لازم له احسانَ
‏ ولا نعي في الجرنال هيمن له ويغر
دم الشهيد لطخ لـِ مَرْسانا
والمَرسىٰ يوم الدين الكل فيه هيمر
وأنا شعري ضعف ووهن من جوه إنسانَ
مليان مشاعر وطن والظلم أخده مقر
إذا كان سكاتي دهب فـ َ انا صوتي رنان َ
وفاضحني طـــــول العمر
لو كنا فَعلا عَامِلنا (الحــق) بامانه
لا كلب كان يوم قدر يصيب ولادنا بغدر
عبد الودود كان أمله يلقانا
بنعوم في خير الوطن مش غرقانين في البحر