كحل السطور
شعر/ عبير عبدالمنعم
واما قلب الشعر يسكت
مين هيتهجى الوجع
مين هينقش ف الحنين
ولا يرسم فجر طالع
وسط عتمة ليل حزين
فين نلاقي كلمة حلوة
تمحي مر في يوم غشيم
مين هيطفي نار وقايدة
في صدر مشتاق للنديم
واما قلب الشعر يسكت
مين هيعجن للجواعى
فوق سطور الشعر عيش
ووقت ما تحارب في يأسك
سطر شعر بألف جيش
بيت في شعر الحب
تحلف.ان قصور الدنيا خيش..
يوصف الحب اللي ساكن
قلب عاشق أو صديق
يرسم الخط اللي واصل
بين امالنا
يقول في جملة
هو ده احسن طريق..
لما قلب الشعر يسكت
ابقوا شوفوا سطر شعري
وهو ماشي جميل بريء
سطر كان لسنين أسايا
زي طفاية حريق..
أما قلب الشعر يسكت
ولا مواله يموت
مين هيحكي عنا لينا
ولا يمسح دمعة ساكنة
ضحكة مخنوقه في عينينا
قولوا مين يجبر بخاطر
الدفاتر والورق مين
يكحل السطور
التعليقات مغلقة.