كلمتين لوجه الله
بـ قلم/ أسـمـاء الـبـيـطـار
نخرج شوية من المود الصعب اللي إحنا فيه و نتكلم حبة عن نفسنا و عن الحاجات اللي بتبقى جوانا و كتير مننا ما بيقدرش يعبر عنها أو حتى يتعرض لها
إحنا مش ناقصين علشان نحتاج حد يكملنا ،، إحنا محتاجين حد يقوينا
يُجبر ضعفنا علشان ما نتكسرش .
نبقى شايفين الدُنيا بكلامهم الطيب مش بخيبة املنا فيهم .
و كداب اللي يقولك سيبك من الكلام و خليك في الفعل !!
خُدوها قاعدة …..
اللي كلامه يوجع هتبقى افعاله اوجع .
و إللي هيكسرك من ورا ضهرك .
هيكسرك و عينك في عينه .
و ما فيش حاجة اسمها علشان إنت طيب ،، و بتستحمل و معدنك معرفش ايه .
يأتوا عليك بحجة إنك حَمول !!
انت في الأول و الأخر بني آدم لحم و دم .
و ما تخلقتش في الدُنيا علشان تبقى حيطة مايله .
لو عندك إبن( ة)….
قويه من صُغره و علمه يسند نفسه بنفسه
و قبل ده إديله الثقة الكاملة إنه بني آدم لحم و دم مش مجبور
انه يتحمل افعال ما تعجبوش .
و يسمع كلمه تضايقه و تجرحه و يسكت .
أو يتظلم و يعدي .
كل المشاكل اللي ممكن نمر بيها سببها الغرس اللي من الصِغر .
ربوا صح لأن دا أساس لأجيال مش أنت بس .
لأنك للأسف بتربي زي ما إتربيت بالكلمة و الحرف،، و يمكن بالدعوة
اللي كنت بتسمعها أمك أو جدتك .
لأن للأسف انت مش هتبقى مريض بأفعالك لوحدك .
أنت هتمرض ناس كتير حواليك ناس كانت سليمة القلب
و الفكر .
و الكلمة اللي كنت ديماً أسمعها من أبويا الله يرحمه
كان ديماً يقولي أنا ما سبتش حاجة ليكم غير عزة النفس .
يعني علمني إزاي نكون بني آدمين نحس بنفسنا و نقدرها و نعرف قيمتها .
و صدقني لو كنت كده مش هتقدر تييجي على أيا من كان
و هتقدر الناس اللي قدامك كويس جداً .
لإنك ببساطة تحمل صفة كرامة الإنسان اللي هتخليك تحمل صفة أكبر و هي الإنسانية .
التعليقات مغلقة.