كل اللي فاضل من حكايتك …
مسعد البحراوي
كل اللي فاضل من حكايتك نص مش معروف
راجع مرايتك حس نفسك شوف
شوف الملامح في الصور
واياك تحس بخوف
هو انت بس عشان ياواد
بتسيب مشاعرك للبشر
ماسك أوي ف حبل الوداد
مشغلتهاش باللي اتكسر
من سن قلمك والحروف
الله عليك
منتاش ياواد ناقص نصيب
ولا فقر أهلك كان دا عيب
ربك في قلبك عاش طبيب
والبركه طارحه وف ايديك
ملعونه جواك الظروف
عارف ياواد
أنا كنت اشوفك بفتخر
تنزل دموع أفراحي بيك
إنت الكريم اللي صبر
على خلق يا ما باعوا فيك
ومهما قلبك يتعصر
الطيبه ماتفارق عنيك
الله عليك
اسمع ياواد
هتشوف حياة سعد وهنا
لرضاك بأحكام ربنا
متربى قلبك ع الغِنى
فاكر عليك ناسي اللي ليك
الله عليك
في إيه يا واد
هتعيش ياواد طيب كده
وهتمشي وحدك في الدروب
رغم الحياه متنكده
لا بتعصى بل دايما تتوب
اسمع ياواد
رغم اني متعذب معاك
راضي أوي وراكب وراك
جسمي اللي ضمك أو رعاك
باع اللي حيلته واشتراك
كان اللي بيردد دعاك
مني إلي الله عليك
كلمات/مسعد البحراوي
التعليقات مغلقة.