كنا زمان…بقلم اشرف الشناوي شاعر عامية البرامون المنصورة
كنا زمان
زى العصافير
نصحى الصبح
اوام بنطير
كنا نغني
ونملا الدنيا
غناوي وفرحه
وأما بنزعل
نلقى قلوبنا
ثواني مسامحه
كنا بنضحك
ضحكه وصافيه
كانت الدنيا
جميله ودافيه
كانت الروح
جوانا بترسم
حتى اللقمه
مابينا بنقسم
قبل الشمس
ماتطلع كنا
نفتح كل بيبان
الجنه
كانت الدنيا
بخير وزياده
كان العشق
صلاه وعباده
كانت اللمه
على ال حواديت
ست الحسن
وشاطر شاطر
كان بيجيلها
في اي مخاطر
وأما الغوله
تقابله في سكه
كان يحبسها
في ايها حته
كان بيطير
بجناح الشوق
لجل مايطلع
بيها لفوق
جنب القمره
وفوق النجمه
كنا ننام
على ريحة النسمه
نصحى نلاقي
قلوبنا بتضحك
نلقى النور
بيكحل فينا
نصحى نكمل
وفي اغانينا
نلعب نرقص
نرجع تاني
نعيش أمانينا
اول مالاحلام
تتشعطر
كنا ننام
في احجار
اهالينا
كنا زمان
زى العصافير
لما نطير
عارفين بعضينا ……….
التعليقات مغلقة.