كونسلتو …بقلم وحيد علي الجمال
انا مش هقدر أكابر تاني
وارجع امثل دور مش دوري
واعمل فيها شخص مثالي
ولا هستنى الموت في مكاني
فجأة الشيب عسكر في ملامحي
ملا شروطه رفض يطاوعني
شد في عمري حزامه الأمني
علق فوق تواريخي وصايته
و عمل كونسلتو
حطني طبعا تحت حمايته
يا ما فرقت وياما هجرت
و يا ما انا بعت وكنت اناني
عمري ما كنت في مرة صدامي
رغم الطيش اللي في أفلامي
أو حكايات الحب الدامي
كنت بعشها بشكل درامي
بوصف وارسم فيها ملامحي
و بحدد وبكل جراءة
زي ما اكون بوصف ف نهايتي
كان يشغلني خروجي الآمن
فيش أحوال قلبي الجنائية
ظهرت فيه ابيات غزلية
لكن مش معروف مصدرها
ولا بصمة قلبي السرية
حتى وجودها جوه صحيفتي
مافيهاش سبقة ضد مبادئ
قلبي في حبه في كره خيالي
عمري ما خنت في مرة حبيب
حتى في وجعه ببقى طبيب
كنت بفارق انا بالجملة
واقفل كل بيباني بكلمة
كنت بدوس على قلبي و اعاند
وافضل ماشي بحزني وشارد
ليّا دماغ يصعب ترويضها
تعبان جدا من قراراتها
لازم قبل ما تدي اوامر
تبقى فاهمها مش بتكدها
مش براوي أو عدواني
غير في مرايتي أو مع نفسي
لما بناقش كشف حسابي
ممكن اسيبني كمان مخاصمني
واسجن نفسي في وهم وصالي
واركب مهر عنادي الفاضي
غضبي تملي بيفضل جامح
واشرب مالح وارجع أصالح
واغفر كل الماضي الكالح
انا محتاج أخرج من نفسي
واسكن نفس تكون فهماني
(انا محتاج اتوضى واصلي )
مش محتاج دكتور نفساني
………………
وحيد علي الجمال
التعليقات مغلقة.