لامحين أمل بقلم / حسن أبوعرب
من خَلف شِيش البردَانين
الشمس بتطُل بخجل
من فوق شواشى المستحيل
لامحين أمل
فى السما واقفه الطيور
والملايكه صفوف تدوُر
خلُّوا ليل العتمه نور
يابطل إنت الجَسُور
يلَّا حارب كل جُور
قُم وعالج الخَلَل
قُم وغَيَّر خط سيرَك
خلى زادك يبنى تقوى
والرفيق جواك ضميرك
ابنى مجدك بالعمل
اصحا صحصح م السُبَات
واطوِى كل قديم وفات
بكره راح نصبح رُفَات
مهما طال بينا الأجَل
اكسر جدار الشرنقَه
اخرُج بَقَى
الليل لايُمكِن يهزِمَك
مهما سوَادُه يألِمَك
الريح مبتهِزش جبل
اوعاك تخاف
مِن مين وكان
جبار وظالم أو جبان
واملَا قلبك بالإيمان
خليك بطل
العِبرَه مِش بازاى وِكَم
ولا ابُويَا مين
أوخال وعَم
وان حَدِ سَبَّك يوم وذَم
ربك دا فارِج كل هَم
ودا شئ أكيد
مش محتمل
يامصر حُبك قَدَر
للبحر موسى عَبَر
الله أمَر
بعَصَاه ويضرَب للحجر
ينابيع كتيره تنفَجَر
اثنَى عَشَر
موسى كَلِيمِك قد رحَل
والدمع يَم
لسَّه الورِيد بينِز دَم
لَجلِك انتى يا أغلى أُم
كل نقطه تقول بحِبك
روحى مِلكِك
حُب مكتوب م الأذَل
التعليقات مغلقة.