لبست السلطنية…
بقلم محمد كسبه
سلطان وضاع زماني
و لبست السلطنية
و كبرت و كبروني
في آخر التمثلية
إللي بيقولي جدو
و إللي بيقولي عمو
و الحلوين ياما قالوا
يا جمالو عليك يا خالو
و لبست السطنية
في آخر التمثيلية
العرض مرة واحدة
و العمر بسرعة عدا
شوفوا يا ولاد النهارده
دوري في بداية التمثيلية
الشمس بخيرها هله
و الأرض طرحه غلة
و عيل ماسك و شادد
في ديل الجلابية
فرحان بحصان حلاوة
و حتة سمسمية
في الطين بجري و بلعب
و معايا خمسة سته
و أمي بتجري و تضرب
بعصاية الغلية
و مسابتش مني حتة
و لما حاولت أهرب
حطت كحل ف عينيا
عشان خايفة عليا
دلع و دلعتني
حنية و شبعتني
و يامه نضفتني
بالكوز و الطشت يا أمه
مش عاير استحمى
الصابون بيجي في عيني
و عيني بتوجعني يا أمه
بالليفة و الصابونة
و صفيحة ميه سخنة
تدعكني ١٠٠ / ١٠٠ و تلبسني
الصديري و العمة و الجلابية
في الشتا و الدنيا ساقعة
و البابور و اللمبة والعة
و تعالى يللي غاوي
نسمع أحلى الحكاوي
و اللي واخده البطولة
حكايات امنا الغولة
في الرعب درجة أولى
و قمة الإثارة
مفيش حد في الحارة
و كلاب الليل بتعوي
و اللمبة الجاز بتطفي
و غناها مالي المكان
و بتطبطب على كتفي
و أنا نايم في الأمان
ولا شايل هم دنيا
دلع و دلعتني
بخور و بخرتني
و يامه ع الكتف شالتني
و لما العين صابتني
من الناس المؤذية
خدتني و لففتني
على كل الأوليا
و آخرتها عملت عروسة
من الورق و شكشكت
عين كل إللي شافني
و لا صلى على النبي
تستاهل ألف بوسة
امي دعوتها سندي
لو كل الدنيا ضدي
في أول التمثيلية
أمي أجمل هدية
و في آخر التمثيلية
دعوتها باقية ليا
التعليقات مغلقة.