لسة الأماني ممكنة بقلم مدحت رياض
ملعونة كل الامنيات الممكنة
لو حلمي أبعد م السما
هيفيد بايه الفجر الجديد
والعين بتتهجي العمى
في سباق دموعك يا زمن
انا نلت كل الاوسمة
كل الحروف من صبرها
صبحت سكوت متلجمة
وكأنما
صمت الزمن اصبح صلاة
وانا روحي ليه مستسلمة
هستنى ليه الفجر الوليد
واوصف جماله ورقته؟؟
وانا قلبي تاه من شدته
فجرك وليد وانا هوصفه
بكلام ضعيف
والوصف لو زاره الالم
يصبح كفيف
مع انه موش عاجز نظر
عاجز حنين
ضاع منه اغلب رقته
ويا السنين
مليون امل جواه وتيجي
صدمة تسكته وتشتته
والصمت يغلب فرحته
ويموته
مع انه شال جواه كتير
كل الحبايب كان لهم
دايما مكان
نزلوا في محطات الزمن
من غير اوان
فيه اللي ودع واللي بايع
حتي بينهم قلب خان
عاوزاني روحي تبقي ليه
متبسمة
وكأنما
عاوزاها روح متقسمة
نص الجراح جوايا يسكت
والامال بس في عيونك
تبقي ليه متكلمة
وحروفي ترسم فرحتك
وبدعوة اامن خطوتك
واديكي عمري ويبقي سرك
يبقي مصدر قوتك
وابقي اللسان لوحزن زارك
او بخوفك سكتك
عاوزاني عايش في الغرام
وفي الضلوع بتنفسك
ويخبي قلبي كتير الامه
وبالسعادة يحسسك
معادتش تفرق اصلها
مين جوة منك
حبه باقي او غيابه ينقصك
كل الحروف مبقتش تنفع
بينما
روحي انا متلجمة
مبقيتش قادر اني اكمل
ولا امثل مسكنة
ملعونة كل الامنيات الممكنة
التعليقات مغلقة.