لسَّاك فاكر … سامح لطف الله
لسَّاك فاكر
لمَّا الأبلة بتمسك إيدك
علشان تعدل خطك
نازل يشرب آخر السطر
أيوة بتضحك
لمَّا قلامك جوة صوابعك
ترعش منك
يرقص فوق الصفحة الحرف
لسَّاك فاكر أول كلمة
يقولها لسانك
وامك تضحك
وانت تحاول تنطق حرف
كانت الميم؟ لأ كانت به؟
نفس تاريخك قدام عينك
لما ولادك بتقول ته
وانت بتضحك
وتقول به
دايرة ودايرة قولها ياآدم
دانت الرب شرح لك به
علمهالك ولسلسالك
كلنا قُلنا الميم والبه
التعليقات مغلقة.