لقيط خاطرة عامية بقلم / سيد جعيتم
وعيت على دنيتي
غريب وحيد ف الكون
عايش أسير محنتي
شايل هموم بالكوم
وجعاني قوي بلوتي
ووجعي لمين اشكيه
يا رب دي قسمتي
جرح نفسي .. يهون
وأنا صابر
ومش قادر
اعيش غريب خطوتي
في الدنيا شبعان لوم
ولما تزيد محنتي
أتعكز على دمعتي
عايش وأنا حاير
ما بين الناس متعاير
وفين امي تشيل عني
وتمسح دمعة من عيني
خايفه فيوم تتشاف
وادعي وأقول يا رب
اوهبني ضمة قلب
لجل اقدر أشيل حملي
دا تقله رزيل وتانيني
سنين كاتم مرار وجعي
ولا بشكي
ولا قادر في يوم احكي
و أحكي … لمين
لدنيا قاسية حوياني
وبتلومني
ولومها يرن في وداني
يغرقني في بير
ملياه دموع عيني
و نفوس الناس
ما يوم بتروق
مليها الشوك
تجرعني مرار الكاس
وقولهم ياما عراني
و راس مالي
يا دوب هدمه
بميت رقعة وستراني
بحلم كتير بضليله
وشمس ولمة العيلة
وكسرة عيش ولو ناشفة
أشاركها مع أخواتي
و أمي بنظرة من عينها تغطيني
واسمع أبويه بيصلي
ومن قلبه بيدعيلي
في الملجأ انا ياما صبرت
لحد ما يوم
قالولي كبرت
مكانك أحق بيه غيرك
جنب الحيطان لقيناه
وحكايتي تاني تتكرر
والايام تدور وتلف
وما بتتغير
ووصمة عاري دباحني
وابن حرام… ملزماني
ترن دايمًا في وداني
ولا حيطة تداريني
ولا لغلبي ضليلة
ياناس.. يا خلق دلوني
اروح على فين
التعليقات مغلقة.