لقيناك عند الجامع
أسـمـاء الـبـيـطـار
كتير من الأمهات بستقل بعقلية الطفل خصوصًا في اول سبع سنين
فبتديله للأسف معلومات غلط كتير من باب انه لسه عيل و مش فاهم
و لما يكبر يبقى يعرف أو يفهم أو أو
و طبعاً كل دا غلط لأن الطفل في المرحلة دي بيكون زي صفحه بيضه و حضرتك بتكتبي عليها بقلم حبر يعني صعب يتمسح و إن اتمسح بيسيب اثر سئ جدا .
كتير من اسئلة الأطفال الوجودية اللي ما فيش طفل ما سئلهاش
احنا جينا ازاي
لما يتفرجوا على البوم صورك ماما احنا كنا فين
و اسئلة من دي كتير .
و كتير من الأمهات بترد بأجابات غير منطقية للأسف بتفضل محفورة في ذاكرة الطفل .
يعني سؤال زي ماما إحنا جينا ازاي ده ؟
بدون وعي للأسف من بعض الأمهات أو للأحراج من السؤال
تقوله انت ما جتش .
إحنا لقيناك عند الجامع
و سبحان الله الطفل بياخد الكلمة دي بطريقة جديه بصورة مرعبة .
و مع مرور الوقت بيفضل ده انطباع الطفل
و للأسف بيتعامل على الأساس ده و لما بيكبر شوية و بالطفولة البريئة بتاعته لما حد بيزعله يقول ما هو انا مش ابنكم .
و لما يكبر شويتين و ييجي له اخ اصغر و بحكم أن الصغير له معامله خاصة هتلاقي نفسيته تحت الصفر و هتلاقيه بيتصرف بطريقة عدوانية و يمكن السبب يكون رايح عن بالك .
و مش هتصدقي إنه هيكبر و هتلاقيه بيقولك هو صحيح يا ماما انتوا لقيتوني عند الجامع .
و اد ايه انتي هتبقى موجوعه من الكلمة اللي بيقولها بحسرة و هتبقى مش مصدقة أو مش مستوعبة إنه لسه فاكر حاجة زي دي .
اختي و صديقتي ..
المرحلة الأولى دي من مراحل نمو الطفل العقلية من اجمل و اروع ما يكون
المرحلة دي مرحلة الجذور اللي عليها بتتبني ذاكرة الطفل
بيفتكر لعبك و حكياتك و قعدته جنبك و انتي بتخبزي الحاجة الحلوة اللي طلبها في فرن البتوجاز
هيفتكروا لمتهم حواليكِ و انتي بتقولي لهم كان يا ما كان .
و انتي بتحفظية جزء من القرأن
بيفتكر حكمة قولتيها و اتنقشت على جدران عقله
و لما يكبروا هتبقى ذاكرتهم الطيبة اللي يمكن يعيشوا عليها بقيت عمرهم .
فـ بلاش الأجابات العجيبة دي الله يكرمك .
التعليقات مغلقة.