للمولى … بقلم حسن أبو عرب
منتَاش مَلَك!!
لو تِعصَى
هتبَان سوئِتَك
البِس لتُوب المرجَلَه
مش مُعضِلَه
مش صعب حل المسألة
بسِّ انت سَلِّك نيِّتَك
مرهم خطاياك الدموع
والذِكر بيئيد الشموع
بالعدل نَوَّر سكِتَك
اوعاك تقول
الوقت فات
والخلق يابا
ضمِيرهَا مات
يوم الحساب ايه حِجِتَك !!
التوبه مَركِبهَا الهِمَم
الزَم وِجَدف بالندم
وارفَع ايدِينَك السما
وخَلِّي بَابهَا قِبلِتك
يا اللي اتخلَقت مِن العَدَم
للمولَى وَجِّه دَفِّتَك!!
التعليقات مغلقة.