لما الفراشة بتنحرق
مدحت رياض
ليه في الفراشة العاشقة نور؟؟
بتعدي لجل تحصله
ابواب وسور
ليه الفراشة في عشقها
دايما تدور؟؟
مع إن في بعاده الحياة
مع إنها لو لحظة
حاولت …فكرت
هتلاقي سكة للنجاة
ليه في البعاد متعذبة
ولقربه لازم تنتظر؟
ليه الفراشة بتنتحر؟؟؟
بنلوم عليها في عشقها
مع إننا رغم الفوارق زيها
بنجمع الدمع اللي مزروع
في الزمن
بالذمة موش نفس التمن؟؟
بذرة ألم جوة القلوب
فالآهة دايما تنسمع
اوقات نحس بطبطبة
بس الغريب
مبقتش تقدر ع الوجع
نفس النهاية بتنكتب
ونمر فوق حد الحروف
المؤلمة
ليه المشاعر ساكتة فينا
والدموع متكلمة
نفس السؤال انا بسأله
نفس الإجابة المبهمة
ليه الفراشة في عشقها
للموت بتصبح مرغمة؟؟؟
التعليقات مغلقة.