لما انت ناوي ع البعاد بقلم جمال زكي عينر
ليه تمد لي حبل الوداد ؟
وتقطعه تاني بايديك
لما انت ناوي ع البعاد
تشغلني ليه ده حرام عليك ؟
ايه اللي جابك عندي ايه ؟
ما انا كنت عايش جوه نفسي
قربت ليه اوي مني ليه ؟
نسيتني ليه همي ويأسي
حرمتني ليه المنام ؟
وسيبتني من غير كلام ؟
لا رحمت دمع ف عيني سال
ولا فت لي حتى السلام
بادعي عليك يا ابو قلب قاسي
ده انا كنت فاكرك كل ناسي
ظلمتني وظلمت قلبي
تسقيني ليه من مر كاسي ؟
إياك تفكر يوم ما ترجع
حاصدقك تحكيلي واسمع
خلاص كبرت على الخداع
دمعك ما عادشي لقلبي يشفع
وساعتها حاقول لك روح هناك
ما عادشي قلبي حيترجاك
خلاص انا نسيت الأسى
نسيت عذابي نسيت هواك
التعليقات مغلقة.