لما كبرت بقلم هنا سعد
وقلت امتى أنا هكبر
وأفك ضفايرى بإيديا
وألوّن شعرى بلون أصفر
ورمشى أطوّله أكتر
وكحلي زينة لعنيّا
وأمشى بكعبى واتمخطر
أعيش الدنيا حرية
أرفض حضنِك الدافى
وأقول أنا ليا شخصية
وأرفض كل قوانينك
وأصرخ بعزم ما فيّا
كبرت يا أمى عالتوجيه
رفضت وصيتك ليا
عدت سنينى يا أمى
كبرت أكتر من اللازم
كبرت وانحنى ظهرى
وعلى جهلى بقيت نادم
عرفت إنك خبير تعليم
وتربيتك ..
شرحوها فى ملازم
لما كبرت
فهمت إنى
من غيرك ولا حاجة
دعوة منك ساعة الفجر
قضت ليا ١٠٠ مِيْت حاجة
فاكرة يا أمى
لما تضيع حاجات ليا !
كنتِ تسمى بسم الله
تلاقى كل اللى كان ضايع
كتابى لما استخبى زمان
سمع قلبك يدق عشانى
شفع قلبك
فقام راجع
قعدت فى يوم اقول النص
وعِدْت وزِدْت بلا فايدة
ولما سألتنى ميس عايدة
قلبى خاف؛ قلبك حس
دعيتى كتير، لقيت نفسى
بقول النص
ندمت يا أمى وزاد همى
ولو هدفع من دمى
عشان أرجع ولو ليلة
ابوس قدمك واقدّملك
بوكيه الورد يا أصيلة
وأشكر سهرك وحنانك
وأرمى العمر قدامك
صحيح إنك حياة جميلة
التعليقات مغلقة.