لم دمعك بقلم الشاعر الأستاذ مدحت رياض
لما تبقى الشمس أبرد
من دفا يحضن إيدينا
وأما يبقى الفجر أبعد
من حدود الضلمة فينا
والطريق مبقاش أمان
وأما بتسافر بجرحك
فالدموع تملا المكان
قولي واخد ايه معاك ؟
ذكرى باهتة وصورة
للماضي اللي كان
تفتكر بيها اللي غايب
ولا تضمن إن قلبك
راح يضل العمر دايب
ولا تفاصيل المكان
كل دي أحزان شايلها
معدي بيها
يابني ليه ده الناس
بتهرب من الجروح
وانت شايل الحزن صاحب
راضي بيه طيب فين تروح ؟
شايله جوة جيوب حياتك
زي ما يكون الزمن بالقطر فاتك
وانت فارش دمع عمرك ع الرصيف
جاي تبيع الورد دبلان للخريف
تفتكر لو جيت في مرة
وبعت دمعة لحد فايت أو شريت
وقتها هتكون هديت
ولا يمكن تفتكر هتكون نسيت
ده انت هتزود لقلبك
ألف نغزة للضمير
تفتكر لو يوم حصل
هتكون بخير؟
لم دمعك جوة ذاتك
واحتفظ بتاريخ حياتك
لما يقروه بعد منك وانت غايب
وقتها موش راح هتفرق
مين معادي ومين حبايب
مين بيندم انه مسمعلكش مرة
مين بيبكي
انه موش حافظ ملامحك
مين في عينه الدمعة فارة
مين سامحته
ومين هتتمناه يسامحك
المهم لو انت عايش وياجرحك
إبقى خبي الدمعة واضحك
لم دمعك بقلم الشاعر الأستاذ مدحت رياض
التعليقات مغلقة.