لو بإيدى.بقلم.حسن أبو عرب
لو بإيدى كنت اشِّيلكُوا
فُوق جناحى
كُنت اظَلِّلكوا بوشاحى
واقضِى عُمره بحالُوا صاحى
حُبِّى حالَه غير عاديه
لو معايا كنت جِبت الشمس
فى يمينكُم هديه
كنت أقطف م النجوم
اللى فى سمانا
عقد يلمع فوق صدوركم
والنجوم يبقُم شوَيَّه
واشترِيلكُوا جبال تُهامَه
لو دهب
وابنى ليكُوا قصور ماسيه
لو بٱيدى
كُنت اخلِّى الدنيا جَنَّه
والسعاده فيها فرضا
بل وسُنَّه
والحمام ابنيلُه غِيَّه
لو بإيدى
كنت اغُوص فى بحارهـَا تِمَّن
واللآلئ كنت اجِيبهَا
والكنوز المتداريَّه
لو بإيدى
كنت ابيع أيامى كاملَه
واشتريلكُوا الفَرْح جُملَه
وامشى مجهول الهويه
مانتُوا أزاهِير البراح
وانتوا نسمات الصباح
بادعِى ليكُوا بالصلاح
ربِّ يرزُقكُوا الفلاح
م انتُوا عُمرى وكل فرحِى
مرهَمِى وبلسم لجرخى
نعمه من رب البريه
بس انا على أد حالى
مِش مِن اصحَاب المعالى
مش من الناس الغنيه
اللى راضعَه للقساوَه
والطِباع دايما غبيه
قلبى فدادين مِن محبه
قلبى مبيعرفش حِده
والدليل دمعات عِنَيَّا!!
التعليقات مغلقة.