لو بايدى شعر / أشرف الشناوي
لو بايدى كنت اجيبلك
م الحياه اكبر وسام
لو بايدى كنت ارسم
فوق ملامحك الابتسام
كنت اشيل الحزن عنك
غصب عنك مش كلام
لو بايدى كنت افرش
طين غيطانك بالغرام
كنت اجيبلك فص لولى
مش ميزان او بالجرام
بس حظك كنتى ليا
وان انا مليان لحام
ايوا عاشق لون عيونك
لما اشوفها فى لحظه انام
انتى برج وغيه ليا
مهما كان الجرح فيا
باحس فيكى بالسلام
لو بايدى كنت اجيبلك
من الحياه اكبر وسام
شايله حمل كبير وساكته
تضحكى رغم الاااام
كل يوم بيعدى بيكى
ملحمه جوا الحياه
رغم جرحك شايله ملحك
والزمن كاسرك معاه
بكره جى بمية وجع
جى يكسر فى اللى باقى
عشان نقع
جى يقطع فى اللى باقى
من الرقع
جى يشد الروح ويخلع منها
سر الاله
لو بايدى كنت اجيبلك
م السما حبة نجوم
كنت أكمل دنيتى
لو حتى عوم
كنت اجيبلك م السهر
كام ليله نوم
لو بايدى كنت اجيبلك
م السعاده
بس يوم ……………….
التعليقات مغلقة.