…… ليل الغربه ……معوض حلمى
صباح السعد يامايا
من الغربه لحد اسيوط
ياوش السعد يامايا
ياطعم التوت
دا ليل الغربه لو تدري
بيشقني موت
وكيف أنسى ..؟
وكيف أقسى ..؟
على روحي
اللي سيبتها يمك
وليه يامايا زاد همك
وانا همومي على كتافي
تهد جبال
عشان بيني وبين قلبك
ليالي طوال
كتبت كتير من الجوابات
ودستها ف خلقاتي
هاقولك إيه .. تحياتي ..
مابتكفيش
ونار أشواقي مابتطفيش
هاقول وحشاني مابترويش
وكيف اهون على قلبك
ويسمحلك
تقولي عليا واد نساي
وأنسى إزاي
ونفسي أفر م الغربه
واجيلك جاي
وهونت عليكي يامايا
ماتسألنيش
مرتاح ياوليدي أو تعبان
وكيف في الغربه يامايا
ينام شقيان
وزاد الهم ف بعادكم
أهات موجوع
عشان اللقمه مش كافيه
تسد الجوع
فاكره يامه
لما قولت في يوم عيالي
لما زاد النوح جراحي
قولتي ليه النوح ياغالي
وليه تنادي وقلبي صاحي
طب ليه تجيبي
سيرة الكفن والموت
وانا قلبي سيبته معاكي
وبادعي في الملكوت
لو موتي يامه
أموت وياكي
ودموعي نزلت سيييييل مطر
والله ماقدرتش
طب مين هايحضن لهفتي
كل اما بارجع م السفر
ويقولي ماكبرتش
واختي يامه في عيوني
دا راس مالنا في دنيتنا
الشرف والعرض
وان كان على شوارها
قوليلها خلاص أهي هانت
وقناوي وفى الفرض
معادشي ناقصني
غير نيشها
وغوايشها
وشاشات العرض
هاتطول غربتي حبه
وكمان حبه
عشان الخلق يامايا
يشاوروا عليا ويقولوا
دا واد عتره
ماباعشي الأرض
وأحلفلك بإيه قولي
لاجل تصدقي قولي
دانا ربايتك ..
وانا مرايتك ..
وانا رايتك
في وسط الخلق
وانا الحق اللي عمره مامال
وانا الضهر اللي دوم شيال
وصية أبويا يامايا
هاشيلك شيل
برغم الغربه قسايه
وهده الحيل
وعمر الغربه يامايا
ماتغير في طبع أصيل
إزاي الغربه تغويني
وأعيش مسطول
ومين في الغربه يامايا
عاش معدول
غيرشي الحوجه والزنقه
وقرش يعدي م الخنقه
وقولي لمرتي تتحمل
ساعات والنت هايحمل
واكلمها / واطمنها
قوليلي عامله ايه وياكي ..؟
وكيف البنت …. تعباكي ..؟
وكيف الولد يامايا
ياريته زيي يرعاكي
ياريته يحس إحساسي
وانا في الغربه مشتاق لك
ونفسي يامه أرجعلك
واشيلك على راسي
وأبوسك من كعاب رجلك
وأعطر روحي بترابك
نامي وطمني قلبك
قناوي ع الدوام فاكرك
ماهوش ناسي
قناوي ابنك
ماهوش ناسي
………………………….
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.