ليه الحزن
رضا أبو شنب
ليه الحزن في وشك يابني
ليه بتفكر وتعذبني
دانت الغالي عليا بحبك
دايما شايلك جوه في قلبي
بحلم تبقي راجل لاخواتك
تنفع امك وتكون جنبي
لما اكون تعبان هتشيلني
او محتاج دايما تسندني
بعدي مشيبي تكون عكازي
وتكون ايدي وكمان رجلي
وانت صغير كنت بلاعبك
كنت تحب تشد في شعري
وافرح لما بتجري ورايا
وابقي سعيد وانت بتضربني
لما بنام كنت تصحيني
نفسك تبقي تمللي في حضني
لو يوم تتعب او تتألم
قبل ما تصرخ او تتكلم
كنت بشيلك وافضل اجري
وافضل الف الكون علشانك
حتي ايديا تبات علي خدي
طول الليل سهران بدعيلك
ترجع ليا وتفضل جنبي
ترجع يابني تنور بيتك
وتعيش ليا وتفضل سندي
اوعي تشيل الهم في قلبك
حاول دايما تحمد ربك
مهما تشوف من حال الدنيا
اوعي تخلي الدنيا تهدك
عيش ايامك دايما راجل
خلي عزولك يبعد عنك
خلي الحكمة تمللي في راسك
واوعي لسانك يفلت منك
سلم روحك للي خلقها
لما تحبه اكيد هيحبك
اضحك تلقي الدنيا بتضحك
تبقي سعيد ومحدش قدك
لما بتملي الدنيا سعاده
تلقي الكل بيطلب ودك
وبتشربها تمللي زيادة
لما تمللي بتحمد ربك
لما العادة بتبقي عبادة
ذكر الله هيطمن قلبك
لما هتملي القلب بنوره
تلقي جميع الناس بتحبك
وافضل طول العمر ادعيلك
ربي يزيدك ويطول عمرك
وابقي ادعيلي لما اسيبك
قلي يارب ينور قبرك
وافضل فاكر دايما اني
اكتر واحد كان بيحبك
التعليقات مغلقة.