ماتختشيش بقلم اشرف الشناوى شاعر عاميه البرامون المنصوره
اوعى خوفك يخطفك
ياخدك بعيد
اوعى تنسى ان الامل
جواك اكيد
دا الحلم نور بيدق
فى حيطان القبور
ويصحى كل الميتين
اوعاك تسافر ضحكتك
تفضل حزين
اضحك وعيش
عمر الامل مابينتهيش
قوم وعافر من جديد
وارسم حياتك من مافيش
ماتختشيش
كمل حكايتك للنهايه
وافتكر انك مرايه
للى واخدينك امل
افتكر انك لهم
اجمل حياه
وانك برغم الجرح
فى عيونهم .اله
قوم وكسر يالا
فى حيطان السجون
بكره الوجع يحبل امل
والسكه هتبان للعيون
بكره اللى راح يرجع براح
والجرح يدبل م الدموع
بكره الامانى تحسها
زى الشموع
اوعاك تخاف
م اللى انكسر
عيش باللى فاضل
م الضلوع
طبطب على روحك
وعيش
ماتختشيش
صدقنى
من غير الامل
تلقى اللى باقى
جوا منك
مايساويش
التعليقات مغلقة.