ماعادتش بتفرق
وائل هيبة
لما تكون مش فارقة معاك
لازم تقلق
عارف ليه
علشان كنت بتدي الكل
وتنقذ ياما قلوب بتعاني
وهي بتغرق
علشان كنت بتهدي سنينك
للي تحبه بكل أمانة
وهو بيسرق
لما تكون الشمس بتغرب
قدام عينك وانت بتضحك
وأنت بطيبتك
علشان غيرك
ياما حزنت وهي بتشرق
لما تكون مش فارقة هتعرف
إن الباهت قدام عينك
يمكن كان من جوه أصيل
وأنت أديت العمر بأيدك
لجمال زايف دايماً يبرق
كنا بنحلم
والأحلام مركب بتسافر
من غير قائد
واللي بيمشى معاها بيغرق
عيش للناس والحب وحاسب
أوعى تحاسب بسنين عمرك
ترجع بعد ما ضاعت تبدأ؟!
بس ساعتها يا رب يعينك
حتكون حتى ملامح وشك
مش عارفينك
لما تحاول تبدأ تاني
حتكون جوا الروح أفراحك
أو أحزانك
في الحالتين ما عادتش بتفرق
التعليقات مغلقة.