مالك سوى الرحمن كلمات درويش جبل

مالك سوى الرحمن كلمات درويش جبل

جسم الفقـير اشتكى
م الــــبرد والهــزلان
وكأنه مـش مـننا
ولا عمره كان إنسـان
عايش على الأرصــفة
يستجدى فى الارغفه
أو هِـدمه فيـها الدفا
تكفيه هجــوم العَـفَا
مِ الجـوع ومِ الحرمان

……………………

إدينى حاجـه يابيـه
لو حتى نص جنيه
والبيه فى عربيته
فتش جيـوب بدلته
مش لاقى فيها جنيه
قال له مافيش فكه
أخــد الفقــير ســكة
والدنيـا نازلة مطـر
كأنه ســيل وانـهـمر
لقى ع الرصيف دكه
……. ……………

كَــوَّع عليــها ونــام
على فرشة م الكراتين
واتغـطى بالجـــرانين
لســه المطــر شــغال
يا دنيه ماشية شمال
مبتنصفيش مظلــوم
نام الحــزين مهمـــوم
قال يقرا فى الجورنال
يمـكن يحـس بدفـا
من حـَـر نــار الجــفا
ودمــع عيــنه ســال

…………………….

جورنال واسمه العداله
كـل الــورق مبـــلول
قــراها .. مـن قهـرته
قعــد كمــا المشــلــول
طَبْ هيا فين العداله
والمــــيزان مخــلـول
دا الــــبرد كـَلْ جتتى
قولولى مـين مسئول
…………………..
رفـع عنيـه للسما
من غــير ما يتكلم
دمعة عنيه دَعْوِتًه
والقلــب يتــــألم
مالها قلـوب البشر
جامدة وزى الحجر
حننهــا يا حنَّـــان
مايحسوا يوم بالضَجَر
مِ الـــبِر والإحســـان
جَالُه جَــواب مِ القَدَر
مالك ســـوى الرحـمن
……. ………… …..

4/2/2020