ماهيش محتاجه تأشيره بقلم محمد مفتاح
ليه شايف عشق
في عينيكي
بيدارا
وأنا عاشق ل دي الحاله
فيسمح وقت معاليكي
أنا أهديكي
حكاية حب في رسالة
فممكن لو في لحظه نعيش
سوا نتمشا عالكورنيش
وقمر الليل علينا يطل
تيجي فجاءه بتاعة الفل
أجيبلك عقد فل جميل
يامحلا الليل
بحكاوينا بيتمايل
اقوم قايل
بحبك قد نهر النيل وفياضانه
وشجر الكون وأغصانه
تقولي أسكت علشان الناس ماتسمعناش
وأقول تاني يا أحلي ما ف الحياه يتعاش
بلاش تلوميني علي حبك
ده يكفي بس وأنا جنبك
من الدنيا مابتمناش
يديمك نعمه في حياتي
مسحتي الماضي و الآتي
معاكي بتحلي أوقاتي
بحبك حتي في سكاتي
وعنك لحظه ما استغناش
ومن غيرك حبيبتي الدنيا دي ماتسواش
بشوف الضحكه في عينيها
تنسي الهم والحيره
تخش القلب بحنانها
ماهيش محتاجه
تأشيره
التعليقات مغلقة.