ما تبصش لغيرك …
جمال زكي عينر
طول ما انت بتبص لغيرك
يحرم عليك فى الدنيا تعيش
خليك قنوع حيزيد خيرك
لو هدمتك هلاهيل من خيش
ارضى بعيشتك خليك شاكر
لربك وفضله عليك
كفايه بس انك قادر
تشوف خلقه بنن عينيك
الستر بيدوم بالرضا
والرضا دا كنز لا يفنى
ودنيتك كده أو كده
آخرتها من التراب حفنه
لو بالنصيب مانتش راضي
طب قوللي ايه ممكن يحصل ؟
العمر حيضيع ع الفاضي
ولغير نصيبك ما حتوصل
ارضى بنصيبك واسترضاه
عمرك ورزقك متقدر
عند الاله مكتوب فى علاه
محسوب لا ينقص ولا يكتر
اسعى وشارك ويا الغير
ربك بيرزق بالأسباب
بيرزق العصافير والطير
بعد اما يسعوا ذهاب واياب
بقلمى الشاعر جمال زكى عينر
التعليقات مغلقة.