محبتنيش بقلم مها الخواجه
محبتنيش ومعترفة
بشوف أفعالك الزايفة
بصدقها
واكدب كل أحاسيسي
وقلبي معايا ليه وقفة
خلاص فتحت مش خايفة
بقيت عارفة بإنك برضو
مش ليا
وإني كمان نهاية الأمر
وحديا
تعبت كتير مع قلبي
حاسبته كتير وشيِّلته
كمان ذنبي
قاسيت وياه وكان هو
سبب غلبي
محبتنيش
وعمرك يوم ما حسيتني
وكنت واخدني تسلية
بتملا بي فراغ وقتك
ووقت ما كنت بحتاجلك
ألاقي الصد كان ردك
وكنت بقول أكيد مشغول
واجيب أعذار وتشفعلك
وامني النفس بوعودك
خلفت معايا وعدك ليه؟!
وأنا اللي حافظت على عهدي
وعدتك يوم ما حبيتك
أكون ضلك واكون بيتك
وبعت الكل وشريتك
لقيتك كل يوم بتبيع
مخوفتش….إني منك اضيع
ياشاطر في الشرا والبيع
ياعايش بالخداع والزيف
في تمثيل الهوى حَرِّيف
محبتنيش
التعليقات مغلقة.