محتاج افرفش بقلم الفلاح الفصيح معوض حلمي منشأة بطاش تمي الأمديد دقهلية
……………………………………..
ملت وداني تسمع التفاهات
باسمع أغاني وخلق حشيشه
وواد غواني مدعو بحبيشه
باعوا المبادئ ع الهوا حصري
وحشاني سينما الأصل والبدايات
ل ابيض ول اسود أجمل الروايات
محتاج افرفش حبة بالمصري
محتاج لسمعه يناكف القصري
محتاج شكوكو ولعبه برموشه
ويزيد غناوي يهز طربوشه
والكل غاوي يزيدو ويعيدو
واشوف حميده تهد ف ابن حميدو
والأسطى حنفي ف فيلم نورماندي
وأم حميده المتينه ع الباز أفندي
عاشق عزيزه وعيون عزيزه
واسمع بكيزه تنادي على زغلول
يبقى المزاج معدول وعال العال
واشوف سكينه وجوزها عبد العال
وولاد حارتنا لعمنا محفوظ
والسكرية تعدي ع الأراجوز
واسمع أغاني المعجزة فيروز
وحضرة جانم ، حضرة جانم
فاكرين نازاكه وسليمان غانم
تمثيل طبيعي يشدك التاثير
والسهره تحلى نحل ف الفوازير
واحب الريحاني ف دور سلامه
والست ثومه في فيلم سلامه
وفاتن حمامه وسحرها النادي
تنده هنادي يزقزق الكروان
واحب ريا وقلبها الصوان
واحب رشدي مهما غنى وقال
واحب طه يفن بالموال
أصول بلاده وبيها متقيد
واسمع أمينه تنادي سي السيد
ملت وداني تسمع التفاهات
باسمع أغاني وخلق حشيشه
وواد غواني مدعو بحبيشه
باعوا المبادئ ع الهوا حصري
محتاج افرفش حبة بالمصري
محتاج لسمعه يناكف القصري
محتاج لسمعه يناكف القصري
التعليقات مغلقة.