مدي ايدك بقلم رضا أبو الغيط
مدي ايدك
للإيدين الممدودين
وامسحي الدمعة اللي سالت
فوق خدود المظلومين
واوعي تنسي توصي كفك
يملا حٍجر المطحونين
مدي ايدك
للإيدين الممدودين
مدي ايدك
للي ضحى بدمه ليكي
واللي عاش العمر يمسح
الدموع اللي ف عينيكي
واوعي تنسي توصي قلبك
ع القلوب الطيبين
مدي ايدك
للإيدين الممدودين
مدي ايدك حبة مدي
للي صان عرضك وعرضي
واللي حلمه عنه تٍرضي
واوعي تنسي توصي عينك
ع الغلابة الشقيانين
مدي ايدك
للإيدين الممدودين
مدي ايدك بالمحبة
للولاد المخلصين
واضحكي ف سرك يا شابة
واملي قلبك بالحنين
واوعي تنسي توصي حضنك
ع السهارى المشتاقين
مدي ايدك
للإيدين الممدودين
مدي ايدك بالأماني
للي عاش ف الكون يعاني
واللي عنده صوت أدانك
احلى من كل الأغاني
واوعي تنسي توصي نيلك
يروي كل العطشانين
مدي ايدك
للإيدين الممدودين
التعليقات مغلقة.