مركب خلاصك…
بقلم أشرف الشناوي
……مركب خلاصك……
ابتسامتك طوق نجاتك
هى سرك فى الحياه
الابتسامه كتير بتبقى
هى طوقك للنجاه
اوعى حزنك يعلا ويبقى
غول بياكل فيك بكاه
عيش حياتك مهما كانت
الوجع جايلك معاه
فرحه يعنى تعدى بيها
كل جرح وليه دواه
ضحكتك مركب خلاصك
فاوعى يعنى توطى راسك
مهما كان الريح عنيد
بكره تلقى فى ابتسامتك
صبح بيفل الحديد
بس يعنى لو وقعت
قوم وحاول من جديد
الحياه عاوزه المعافره
ساعه تبقى مؤمنه
وساعه كافره
خلى حلمك تحت باطك
دارى عن روحك عياطك
الهزيمه مش نهايه
طول ماروحك جوا منك
قوم وكمل فى الحكايه
الحياه مش بس وردى
او هتفضل يعنى بمبى
الحياه فرحه والم
الحياه اكبر لغم
ابتسامتك طوق نجاتك
والامل هو النغم
بكره تلقى الفجر جايلك
جاى من الارض العدم
جاى وشايل م الامانى
قد كل اللى اتعدم
لو نسيت يوم ضحكتك
يبقى لازم تتهزم ………….
اشرف الشناوى
شاعر عاميه
البرامون
المنصوره
التعليقات مغلقة.