مزاد علني بقلم.وحيد على الجمال

قرب قرب قرب قرب
خش عليه حاول جرب
واللي مايشتري راح يتفرج
من غير تأمين ولا ذل روتين
اشتري وأدفع من غير فيزا

قرب قرب قرب قرب

مش لازم تحفظ تعويذه
ولا تكتب أرقام سريه
ولا قائمة أسعار مضروبه
و فاتورة بأرقام مخصوصة
ولا مظروف مالي ولا فني
اشتري و اطلع مبسوط غني
أسعارنا ملهاش سمسار
ولا سرقه تخليك تتجنن
لو مش عجباك
ابدا ماتخاف رجعها
وخد كل فلوسك

قرب قرب قرب قرب

بضاعتنا من العين محروسة
نزله في كرتونه مخصوصة
تشكيلة جميلة دي عروسة
افتح لنا أول كرتونة
أدي شاعر لسه ف بدايته
متعشم يبقى حاجه كبيرة
مستعجل حبة على نفسه
شعره يستاهل 100بوسة
في الشعر أمير سابق عصره
صدقني ماحدش هينافسه
كلماته حلوه ورصينه
مليانه مشاعر جياشه
حلواني و كلامه بوغاشه
و الفقر دا ماسكه بكماشه
بس ياخسارة طلع معيوب
باع قلمه و بسرعة غريبة
للهشك بشك والسكاماكا
كتب الهشتكه والحكاماكا
بفلوسه يشتري طيارة
راح سكه غريبه ياخسارة
أول كرتونه دي مجانا
دي بضاعةطلعت فتانه
ووجودها مابينا كده عره
شيل يابني ياله ارميه بره

قرب قرب قرب قرب

وفتحنا ثاني كرتونه
ومعانا مدرس م الغالي
مقامُه ف السوق كدا عالي
ليه شنَّه ورنَّه وعلامة
يسقيك المنهج في ثواني
و حسابه مهندس بترول
في الشهر يجمع مليون
لا بيعرف رحمة ولا شفقة
بيقطع لحم الغلبان
و بيصرخ ديما ويلالي
مظلوم في الأجر
ياجدعان
وقت الصلاة يبقى الأول
النور في خدوده بيتصور
دي بضاعه طلعت كدا عرة
شيل يابني ياله ارميه بره

قرب قرب قرب قرب

راح نفتح ثالث كرتونه
مولانا الغالي يامنور
ولا كلمة هنقدر نتكلم
متعين يخطب في الجامع
لا بيحضر ولا عنده موانع
مهمل في دروسه و قوافله
ولا خطبه جمعة بيحضر
ع المنبر واقف بيتهته
عمال يتخانق مع نفسه
ولا حدش ف المسجد
عجبه
ومشاكله زادت بزياده
مش عارف يفتي
ولا يهبب
ولا علم هتاخده
بأفعاله
دي بضاعه طلعت
كدا عره
شيل يابني
ياله ارميه بره
قرب قرب قرب قرب

و معايا ليكم عرض
أخير
أراجوز و بيمشي
كدا على الحيط
و بيكسر عينه كأنه
عبيط
يظهرلك فجأة كأنه
صديق
ويلازمك أيوه في كل
طريق
يفضل يتحنجل
ويمنجل
يتقرب منك يتمكن
ويبيعك أول ما يبيع
لدغته آخر حاجه تشوفها
قاعدته حلوة بس مميت
ديما شايفه أعز صديق
وده آخر عرض بس نهائي
و لا سعر هتدفع ولا باقي
فرصه أخيره كله بلاش
قرب قرب قرب قرب

وبكره معانا عروض
تانيه
حاجات أصلي وحاجات
فلصوا
طازه جديده و مش
بايته
أصلي و عيره
و كله بره التسعيرة
قرب قرب قرب قرب