مسابقة سيدة القصاص لشعر العامية الموسم الثاني من ٩-١٦ أبريل
١- الصبر يا ناس
كلمات محمد كسبه مصر
متلعنوش الزمن
و متيأسوش في المحن
و متقولوش للناس
كلام يحطم جبل
ما ترجعوا لربنا
و إقروا كلام ربنا
و إتعاملوا بالرحمة يا ناس
الخير هيرجع لنا
متدعيش علي نفسك دعوة
و متقولش الأيام سودة
من فضلك إصبر ع البلوة
دي رحمة ربنا موجودة
الله من قبلك قولها كام مرة
و صلي علي رسوله ٢٠ ، ٣٠ مرة
و انسي الدنيا و مشاكلها و ناسها
و قول لهمومك ربنا أكبر مليون مرة
الصبر يا ناس قالوا عنه جميل
و الرضا مطلوب و الدعوة سبيل
و بكره هيعدلها اللي خلقها
و الخير موجود و الشكر قليل
٢- طراطيش كلام
بقلم إبراهيم معوض
المفتتح
نازل بتقله ع الكلام
ما بين الوزن والقافية
قالوا مجلوبه بالعافية
قلت وأنا مالى
دا حالكوا من حالى
ما الجرح برضه إتجلب
محلوبه يا حلب
والحرف فيكى إتصلب
جنب المسيح
والدم فيكى يسيح
طرطش على الجلباب
قمت قفلت الباب
جانى من الشباك
جانى وكان جانى
ماسك ف إيده خريطة
وإوعى تكونى عبيطة
وتقفى تستنيه
هو سعاده البيه
يجى ف أى معاد
مولد وصاحبه عاد
يمنح بإيده الجنة
أو يقطع الأكباد
هو إله البشر بس البشر أوغاد
الكلمه ساحت ع الدروب
والخطوة ساخت ف النضوب
قلبت سكوت ع الوتر
والمنتظر ف الوش وشم من الذنوب
عامل ندوب وإحنا يا دوب
ندوب وسط الخطر
تمثال من الشمع مكشوف
والحر يقطع ف الشجر
والخوف يقطع حبال الصوت
ولما يخاف م الموت
هيلف نور الشمس بأمعاء البشر
يطرح هوس وسط الخرس
يقفل بيبان ف وش الاذان
ويوطى صوت الجرس
تلقى الفرس يبدر رماله ف العيون
يا أيها المجنون إياك تكون
خليك تملى ف اللى كان
تبت ودانك ف اللجام
وإحفر برجلك خندقك
وسط الفنادق والقصور
نايمه البنادق ف القبور
أجرى بحلمك ع الجسور
إرمى اللجام وإرفع عيونك للسما
إحرق قصايدي ف البخور
وإطلب سلام
دا سرب الحمام
بايت ف أمعاء النسور
٣- كـفى دمــــارا بقلم سالم أحمد
– مـصــــر
صورةْ فيها الف معـــنىٰ وكم حكـــايةْ
الف دمعةْ وضحكةْ تايهةْ من البـــدايةْ
شفت فيها طفل خــايف بكــــرا ييجي
يكتب الأحلام همـــــوم قصــــةْ روايةْ
نفسي أحــكي كل معـــنىٰ شـفته فيها
شفت صورةْ من الألـم مكتــوب عليـها
أم تشكي ميت وجــع بـــدون دمـــوع
والف ويل حُـطام سراب بيـن الضلوع
ضحكـة براءةْ وضيّعوها مـن الطفـولةْ
والأمـاني حطمــــــوها من الأمــــومةْ
دمـــــروا فيـــــنا الأمـــــل بـلا تمــــن
وشتتـوا معنى الآمـان مــن الوطـــــن
وكل خطـوةْ بترسـم الأحــلام شجـن
عشان تكون بصمة صراع مـــع الزمـن
كـأنـــهاصــــــورةْ بتوصـــــف إسمــها
ضحيةْ بنــــت فيـــها سـايبه شعــرها
وعمــــلاه بتـــــــوكةْ وكـام ضفيـــرةْ
ونظــــــــرةْ فيــــــها ميــــت وجــــع
وكأنـــــــها النظــــــــرةْ الأخـــــــيرةْ
والغريــــب الأب فيها بيشـــكي حاله
والملامح فيها وصـــف بيحكـي مـاله
تحـكي إنه كان فقيــر عايش حيــاته
نفســـه يبني المستحيل عشان عياله
والدمــــار حطّـــم معــاه كل المعـاني
هدّ فيــه كل الطمـــوح مـــع الأمـاني
عاش مُشتت كان غريب بين الدروب
حرام عليــــــكم غيّروا فكـر الحروب
هوّا شاف الدنيا فيها الشمس صافيةْ
والدمار خــلّاه مشفش غير غــــروب
شفـت فيها طفـل شايل حلـــــم علـم
والخـراب ضيّـع حيـــاته بكــل ظلــم
نفسه يبكي.. نفسه يصرخ تبقى سِلم
بس كانت للأســــف عـــــنوانها هـم
٤-المنفى والبنادق
بقلم مهاب حسين -مصر.
موت بيندلق من سما معجونه خوف وبارود
بيوت من ورق
عشق الحلم اتحرق
ركام البيوت وطاويط
الليل غويط
كلام بيتمسح من بُق الحواديت
غربا في وطن
ولا وطن في غربه
مين يفهم مين
مدن الوهم أكلت وشوشنا
والأشباح لسه بتُحكمنا
وبتحاكمنا
وبتتحكم في مصايرنا
ندق أوتاد المنفى
فين ماترسى
ننزع توب العفه
شبه ملامحنا
خيامنا
أولادنا
أبواب مابتنفتح
أسفلت بيمص دم الغُنا
عزف منفرد
والولد لسه ماتولد
والصبح زي رغيف
عيش متغمس بكا
والبلد حكاوي اتنست
مافضلش حد
ياروح لسه بتعافر
ياحلم تملي مسافر
عود واخلع برقع الحيا
ابتر الغل من كعوب البنادق
احضن اللي لسه صادق
فجر الضمير
بكره حينور كل المداين
٥- كفاية دمار بقلم عاشور زكي وهبة المنيا مصر
في بلدي المنكوب بحرب طوايف الضلال
ما عاد لشعبنا المغلوب على أمره أي خيار
في ليالينا السواد الطوال
اللي ما باين ليها طلوع نهار
تلاقي مآدن حاضنة أجراس كنايس وسط ركام وأطلال
في أرضنا المحروقة بالدمار
أنهار دموع وبحر دم سال
تروي حقول حسك وغيطان صبّار
تشرب عيلتنا الكبيرة عصير التيه طافح مرار
في بلاد تعبد الله
وفي بلاد تقول: لا إله!
تذاكر لجوء صعبة المنال
تبغي ارتحال
تحكي حكاية شعب ضاق وذاق ذل السؤال
بعد ما ساد عليه شوية أشرار
طارت أحلام الحرية مع الغبار
طوق النجاة صار
في سفينة تايهة في محيط هايج ملهوش قرار
عايشين أغراب بلا مال
ولا حضن دافي في فيافي قفار
تايهين بلا متوى ولا مأوى
بلا وجهة مكللين بالعار
احكي يا زمن حكاية شعب
على خط النار
في حرب أهلية
لا زاد ولا ميه
تديرها ميليشات
القاتل والمقتول ف النار
خربت ديار
والعدو الحقيقي ع الحدود
متحصن بالحديد
ظاهرة شماتّه يعلن الانتصار
اللي وصل له من غير
ما يطلق عصفور نار
نجمته طايره للسما
والعرب تلهث تطبّع معاه
معاهدات العار
٦- في ناس بقلم عزيزة سالمي … تونس الخضراء
في ناس واقفة مع الأيام وابتشمت فينا من زمان
في ناس بتخون
وناس كل يوم بتموت
تتغير ياما في ثواني
وترجع تبكي ثاني
ليه الظلم باين فينا
ليه الناس بتجرح فينا
مهما ندمنا ومهما اشكينا
لسا الناس بتجرح فينا
كان زمان عشنا وارضينا
كان زمان عشنا ومابكينا
قاسية قلوب
غلطة نتوب
وفي الآخر نموت
في ناس بتخون
وناس كل يوم بتموت
تتغير ياما في ثواني
وترجع تبكي ثاني
٧- مرسومة أونطه …..معوض حلمي
سوبيا .. سوبيا
انا واحد بياع سوبيا
وعندي الطعم الاصلي
مين يشتري مني ..؟
المشروب حصري
بدم معتق من سوريا وليبيا
سوبيا .. سوبيا
انا واحد بياع سوبيا
وطلعت أصور في الواقع
شوفت مواقع في الصوره
بقت محظوره / ومحذوفه بشرطه
وسوريا بقت أطلنطا
وجابوا لنا خريطه وبالعربي
للوطن العربي على الحيطه
مرسومه أونطه
جواها الناس أشباه ناس
وعقولهم محشيه بلوبيا
سوبيا .. سوبيا
أنا واحد بياع سوبيا
ومعايا السنه على الشيعه
لتنين شربوها خديعه
والفكره شنيعه
والحرب الدايره فظيعه
في اليمن المقطوع شريانها
لحد ودانها
غرقانه ف حوسه / يابت يادوسه
بقينا بطاطس مهروسه
في قعر الخلاط
ورمونا ككسر بلاط
ورجعنا لعصر الوطواط / والضلمه لواط
ومشانق منصوبه على السيبيا
سوبيا .. سوبيا
انا واحد بياع سوبيا
ومعايا مكايد مرصوصه
م الدار البيضا لسوسه
من مسقط للمحروسه
والوطن العربي الهايم
هربان من حلمه ونايم
بتزن على ودانه ناموسه
وربيعه مكانش مفاجأه
كات خطه ومدروسه
وجواسيسهم مدسوسه
نشروا مابينا الفوبيا
سوبيا .. سوبيا
أنا واحد بياع سوبيا
عبوا لنا الأوهام في قزازه
وشربنا بكل لذاذه
دمنا سايل نازل طازه
ودواعش مننا فينا
مفاتيحهم في إيدين أعادينا
ماتقوم يامراكبي وعدينا
ملينا أنين وأكلنا الطين
وسنين كوبيا
سوبيا .. سوبيا
انا واحد بياع سوبيا
ومعايا نصيحه بذمه
الأقصى بنادي الأمه
القدس ياأهل الهمه
إيجى المحتل ودنسها
هدم معالمها وداسها
والناس اهو مات إحساسها
كالسمك المحبوس في الجوبيا
سوبيا .. سوبيا
أنا واحد بياع سوبيا
يامتاهه وتواهه وهوجه
وحدودنا بيرسمها الخوجه
سهانا واكلنا النوجا
عبى لنا الخيبه في قرطاس
نيمنا على وداننا وهاص
والوطن العربي أهو لاص
مات الإخلاص يازنوبيا
سوبيا .. سوبيا
انا واحد بياع سوبيا
٨- بيكفي دمار هيفاء نصري – سورية
بيكفي دمار
ما في فرح
حاجة بقا نضحك على أرواحنا
ما في فرح
لما الوطن هيك اندبح
وين الفرح
لما البلد عمينسرق
والناس يلي هاجروا
يلي انقتل ….واللي غرق
وين الفرح
والناس كلها مشرّدة
والبلد صارت موقدة
والقلب من جوا انجرح
وين الفرح
كل الشباب الراحت بعتم الطريق
درب الشهادة ….؟؟؟؟؟
صار يقتلنا صديق
ما عدنا نعرف مين يلي لابس تياب الوفا
ومين يلْي بهالزمن توبه شلح
ما في فرح
بس سوريين نحنا صامدين
وعالجرح في كمشة ملح
رح نرفع الراية ونستنا النصر
حاجة بقا يكفي دمار بهالوطن
ايدي بإيدك يا أخي
بالعتم خلينا سوا
ونضل تا يطلع صبح
٩- “لسة عايش مش هموت ” بقلم رحاب عمر – مصر
لسة سامع فى الآدان
لسة ساجد فى المكان
والجرس جوا الكنيسة
لسة شايف البيوت
لسة حاسس بالأمان
رغم كام نية خبيثة..
لسة قادر إنى أخلًف ميت جدع
مهما ظنوا
إنى روح عاجزة و فريسة
هدوا بيتى تاجروا بالدم اللى فيا
ورغم موتى
لسة روحى على التسليم عصية
أرضى باقية
مهما غيروا فى المعالم
او أضافوا قبل اسمى
” الضحية “
سايب النور فى المعانى الآيلة للسقوط
لعبة ابنى توب لبنتى ودعوة لامى فى البيوت
والحارات مهما ساد الصمت
فيها لسة ليها ألف صوت
لسة مرسوم عل الحدود
كبريائى
مهما بدلوا فى الأسامى
اسمى باقى
والايمان بالقضية مش جريمة
واللى آمن بالتراب مش مرائى
والتعرى مش قباحة
لو تكون أرضي ردائى
التراب مكتوب باسمى من بداية الخليقة
والسما فكت عليا كل زنقة وكل ضيقة
روح جدودى
لون وجودى
والتاريخ عارف الحقيقة
والنفوس الطاهرة ظهرت
والكلاب طلعت بذيئة
هِدوا عادى
هرجع أبّنى
ألف عزم فى كف ابنى
وابنى عارف إنه عربى
التاريخ متوضى بيه
والايمان عمره ما سابنى
مهما هم الدنيا صابنى
هرجع ارسم كام علم
من اللى باقى فى القلوب
احنا ناس فوق القمم
مش أخرنا طين وطوب
والمآذن لسة صلبة
والأدان مالى الدروب
مهما كان الطلق غادر
والجدار مليان ثقوب
الجدور بتشد فيا
ما أقدر أرفض أو أتوب
لسة فيا عِرق عزة
أقوى من أجمد حروب
واللى حامى الحق عارف
ان أخد الحق غية
أنه تكفير للذنوب …
١٠- ويدمر المدفع بقلم الكاتب رمضان الهجرسي
ويدمر المدفع ما يبني
فى البلاد غير السواعد
يا دموع فى العين وتجرى
ع اللى كأن ينظم قصايد
فى كل يوم مدنة وتبكي
فى كل يوم الخير يباعد !.****
**يا ترى يا ليل لمين الشعر ولا لمين تواعد ؟!
مظلومين فى ريف غناهم
ولا مجروحين فوق “الموايد “؟!
الصبر طيب ولا قاسي
فى الزمان ده يا حلم صاعد ؟؟!
ملح فؤادى على الأحبة وشاب فؤاى !!
فى كل ناحية دمعة جارية تقول ::بلادى
وفى كل قصة سطر يهتف يا ولادى! !
عيني يا عينى شوف حتى الليلة دى !!
صدقوني بكره جاي ليه ويرموا فى عينيا من رمادي ؟،!
بكره جاي بالعروبة وبالمحبة قول قول يا “”هادي “”!، قول يا “هادي “!!*
١١- كــفى دمــــــارا بقلم أحمد يوسف سليم
البلــــد مصــــر
قرب قـرب واسمـع مني
صورة بتتكلم عـن هـمي
صورة وفيها الدمع حزين
عايش حلم بقاله سنيـن
ليه الدنيا بتهدم حـــالنا
وبتهدم بخراب أحلامنا
قرب مني وشوف أحوالي
قرب عندي كتير أسرار
إدخل فتش شوف كتاباتي
كل حروفي عذاب ومرار
لما الأم بترمي جنينها
ع باب ملجأ أو باب جامع
يبكي ويصرخ مين ليه سامع
لما الشاب يبيع أخلاقة
وبيكتب بغبائه حياته
لما القدوه من الأنسـان
بتاريخ لاعب أو فنـــان
لما نكرم راجل جاهــل
ويكون لينا كمان عنوان
لما بننصر كلمـة ظـالم
وبنظــلم بيـها الغلـبان
لما نشيب من واحنا صغار
وبنرسم للوهم شــعار
وبنكتب أحلامنا حكاوي
خلت كل حياتنا دمار
١٢- قالوا بقلم عروبة الباشا من سورية
قالوا : خدولكم حتتين
مواعين مع شوية هدوم
ليه الكتب مالهاش لزوم
راجعين؛ وهمّه يدوب يومين
والقصة مش محتاجة ضابط أو شاويش
ومشينا والمشوار طويل
والقلب مش راضي يصدق
ان الرجوع بقا مستحيل
والحزن للأفراح بيسبق
تلقى الدروب من غير دليل
درب اتقطع وطريق بيشهق
حتى البيبان اتقفّلت
دابت حنين
ليه اليومين
بقوا شهر
دهر
وكل لحظة بتسرق الباقي من العمر الجريح
وفطارنا صبر
وع الغدا غصات وشيح
رحلة قلوبنا كابوس تقيل
والحلم زي دخان في ريح
ولا يتنسيش
..
مستنيين ..
بس اليومين ..
طالوا ومش راضيين يعدوا
يوم من قسا والأقسى بعده
ونخاف لنفضل مسجونين
بالذكريات
بالوهم يمكن كلنا متشعلقين
بالوهم ؟
لأ مهو ربنا مش ناسي وعده
هو اللي قال اليسر ضِعف العسر لو يفضل سنين
إحنا اللي من ملح الدموع
لولادنا ياما خبَزْنا عيش
وإحنا اللي علّمناهم إن الغالي غالي ولو يجوع
وإن الحياة من غير كرامة ما تساويش
راجعين .. ولو عز الرجوع
رب الغلابة المظلومين رح يوفي وعده
وهيضحك الفجر الجميل ..
في قلوبنا من تاني يعيش
في نهار أمل ما بينتهيش
١٣- كفى دمارا شعر الاستاذ طلعت مجاهد
ج مصر العربية أجا دقهليه
كفى دمار
الي متي نعيش
تحت السلاح؟
الي متي نطلب
من العدوسماح؟
أحبتي قد طال
شوقي للكفاح
كفى مانحن فيه
من الأسى والجراح
والتذلل والنواح
لم الضجيج والعويل
والكل عاشق للنواح
ابناؤنا ونساؤنا غرروا
تحت تهديد السلاح
والكل يعيش منفردا
يشجب يدين بلافلاح
بلادنا قد شردت
و زمانها ولي وراح
لاعوده الا بالتآخي
والاتحاد مع الكفاح
عندها يكف الدمار
وعدونا يمضي فرار
والامن يحلق بالديار
١٤- بالنسبة للحب كلمات شيماء عادل – مصر
بالنسبه للحب ال فاقد عذريته
من اول الضحكه ال تشبه لون خدها المهزوم
وقت لما الايد اتبسمت اوجاع
وعيون ما لحقتش النظر ف كوادر الصوره
الخطوه مهزومه
من قبل شمس العمر ما تفتح
عيون بتتفتح وزهور بتتجرح
وثواني مربوطه برموش الخلق
بتراقب خطاوينا
ايدين مسنونه على كلمة وداع حره
متعودين علي فرقة الاحباب
ف زحمة المولد
صفرين بنجمعهم بحبة من سنين بتمر
وقلب يمر على جنة من غير اوليا
نطرح عيون الخلق وشماته الحاسدين
من لحظة لقا روحنا
وبساطة ال مجانين
الخطوه مقسومة
نص ف ايدين اللي بيعافر عشان يفضل
ويتبسم برغم الضي مش الوان
وساند عل الهوا كتفه
وفارش قلبه يستقبل سنين قدام
ونص بيكسر الاحلام
بدون اعذار
بيرمي ف الطريق جبروت
يحلي الموت
وياخد خطوة من غير حتى ما يسمى
يبعتر فوق حروف الحب
خوف يملي القلوب لسنين
ويكفي عيونا بتنادي
وتحضن خوفها ياما سنين
١٥- ورده ياسمين بقلم خالد امير
….
انا فاكر واحنا صغيرين
كان جدي بيحكيلنا فلسطين
كان الدمع بيملى العين
وكان وكان وكان
وكان في حنين
….
ورده ياسمين
غصن الزيتون
عالم طباشير
لا دا كتير
ظلم كبير
عربي أسير
ايام وسنين
…..
ورده ياسمين
غصن الزيتون ومعاه حمام
فلسطين مش يعني سلام
يعني حصار يعني نضال
الدم بينزف م الموال
طب عندي سؤال
احنا مين
ورده ياسمين
…….
في شباب ريحانه في شبابه
والريح بيخبط علي بابه
قوم انت شهيد
امتى العيد
يلا ادينا مستنين
ورده ياسمين
……
الورده دي طلعت دبلانه
صهيوني انا شايفه دبانه
والله ولا ميت دبابه
ولا الف رصاصه وطلقه نار
صرخه ثوار
صهيوني صرصار
عامل جبار
ربك جبار
فاتح صدري ومش بختار
وبالشهاده مبسوطين
ورده ياسمين
يعني فلسطين
١٦ حلم مشروع بقلم وفاء جلال أبو سيد أحمد
مصر المنوفية
وكأول مرة ف وش الريح
برقص كما طير مجروح وذبيح
وبشوف الدنيا بلون أحمر
متكفن بيه كل المجاريح
تصاريح الغدر على الأوطان
مكتوبة بحبر ما لوهش أمان
على إيد سياف غاوي التشريح
ودمار بيطول حتى الأرواح
وحجارة ف إيد أطفالنا سلاح
قول إمتى يا وطني هتبقى متاح
والخاين يقضي العمر كسيح
أتهجر وابعد ليه يعني
دا تراب الأرض اللي مانعني
أنحاز للظلم وأبيع وطني
وأكون شيطان خاين وقبيح
لا أنا خايف من فض منازعات
ولا عمري ف وطني تقيسه ساعات
ولا أقبل غيره يكون لي رفات
حتى إن كان سكني ف قلبه ضريح
أنا شايف وطني تيجانه الشمس
وأولاده جامعهم ود وأنس
والعِلم مدمر أعداءهم
مع حلم جميل واضح وصريح
هاتوا ايدكم يلا نكون أقوى
دي ديابة علينا بتستقوى
والوضع حقيقي ما عدش مريح
١٧- ضحكة وطني بقلم زين ممدوح مصر
ومشيت على نهر ذكرياتي
أبكي على شموخ راح
ولحد النهاردة بكدّب الصورة
وأقول دا خيال وأوهام
مش ممكن أبداً تكون مكسورة
دي الشمس أول غناها كان عندنا
ورقص القمر على ضفاف وحدتنا
دي الوحدة دايما منصورة
جرينا وراحرية بعيونها الملونه
صدقنا بصدق عهود مغشوشة
وقالت احنا السلام احنا الأمان
وكله في النهاية سراب
كله طلع حبة كلام
ومشيت من تاني بس من غير بُكا
ايدي ف ايد الأمل الملهوف
نبني وطن نبني عزيمتنا
لجل ترجع من تاني ضحكته
والشمس أهي رجعت تغني
وعلى ضوء القمر عادت وحدتنا؟!
١٨- كفايه دمار
إمام إبراهيم سراج
مصر -المنصورة-أجا
العين ماليها الدموع
والقلب فيه حسرة
والكل بات موجوع
م الهم والكسرة
……….
يا مادنة عالية ورافعة
فى كل وقت أدان
شاهدة وشاهد ربنا
ع الطهر والإيمان
هدمك غريب عننا
هدمك خسيس وجبان
حتى البيوت إدمرت
يا حسرة بالدانة
مات اللى مات تحتها
واللى نجى جانا
بنوته شايلة كتاب
موؤدة أحلامها
ماشية فى سكة خراب
والخزى ف أقدامها
معاها م الأحباب
أقل م العشرة
أهل وجيران وأصحاب
طامر فيها العشرة
وأب واقف حزين
لا حول ولا قوة
شايل هموم السنين
فى قلبه من جوه
وأم شايله رضيع
ببكى ولا دارى
من حضنها هيضيع
والفقد إجبارى
اللى بنى شامنا
بناها بالعزة
بنى قصور وصروح
ما شافتش يوم هزة
دلوقتى تسمع حلب
بتنادى على غزة
وأدى صورة قدامنا
كل اللى فيها مرار
تسمع لسان حالنا
بيقول كفاية دمار
بيقول كفاية دمار
……
١٩- حلم الصغار بقلم عبده مرقص عبد الملاك سلامة
جمهورية مصر العربية
طلع النهار
و غنت الاطيار
على فرو ع الاشجار
و تفتحت الازهار
و خرج للحياة الصغار
يلهون
يلعبون
يضحكون
يغنون
فى الباحة قدام الدار
قعد على العتبة جسار
و اتلم حوله فريد و عمار
و محمود و مقار
و ليلى و مريم و ازهار
يسمعوا عزفه على الجيتار
و الطبلة فى ايد مختار
و غنى الصغار
( طلعت الشمس و اشرقت الانور )
و بعدين
قال محمود انه يتمنى يكون طيار
و لعب بطيارته الورقية
و جسار موسيقار
و ارهارمطربة
ووسام فنان
يرسم بالالوان
لوحات عن جمال الانسان
و المكان
و يخلى الحياة كرنفال
و فريد يحلم يكون شاعر
يكتب الاغانى و الاشعار
و سالم عاوز يكون مهندس معمار
يبنى الجسور بين الانهار
و عمر عاوز يبقى بيطار
و على عاوز يكون جراح
و حسن يكون عالم اثار
وقف و لد رسم على الجدار بستان
و بنت رسمت عروسة و حصان
و جسار رسم على حيطة الدار
قلبين متعانقين
و يخترقهم سهم و حولهم ورود و اشجار
البنت كتبت جوه القلب اسمها ازهار
و الولد كتب جوه الفلب التاى اسمه جسار
و صحك الصغار
و هللوا
جسار بيحب ازهار
و ازهار بتحب جسار
و على غفلة
تيجى قنبلة
تشعل النار و تهد الديار
البيوت تنهار
و الاشجار
و تحت الانقاض تعانق الصغار
و حولهم الاطيار
ضاعت الدار
و اتحرق الجيتار
و مات جسار و اخواته الصغار
الدخان حجب شمس النهار
و حولها لظلام
و سال الدم انهار
و عم الكون الدمار
٢٠- زخات شُهب جمهورية مصر العربية
كلمات مسعـد البـحراوي
بتطفي شوق فاق اللهب
وتّْصَحي أحزان ميته
قدمنا ميت مليون سبب
برضه التُهم متثبته
يالآ العجب !
على خلق بقلوبها الذهب
في الطيبه ماسكه متبّـته
مقلوب لها الوِش الخَـشب
ونوايا سوء مِـتبيته
والغيظ يغيظ حد الرُكب
خلىٰ الخُطى متلكفته
هربان طريقها من النَسب
ماشيه ب روح متشتته
شرق وجنوب وشمال و غرب
ومُغتـرب
لساه بيسأل عن جذور
أو بذره واحده منبته
جايز يصونها فتتنصب
وتعيش معاه متستته
تطرح شواشي من الرُطب
دراريّ مُشْ متزيته
بتشع نور يكسر سُحب
تنزل مطر
قطرات عبير متفتته
لساه أسير جوه الكُـتب
ولذكرياته المُلْفِـتَه
أيام ماكان يملك عَـصب
ودروب طمـوٓح متسفلته
ملحوظه يااهل العُـرَب
بتعيدوا زمن الأسـبِته
راح تاخدوا إيه من مُغتَصِب ؟!
غير ريح بريح مِتّـوْلِـتَه
لا هتلقوا فيه أصل وْحَسَبْ
ولا يِـخلىٰ فُـوهْ م المَقْـلَتَه
على سَمَّاعين مَغنىٰ وطَرَب
واصحاب عقول . ومفَـوِتَه
سايبين قلوبهم تتنهب
من( مُـزه )غاويه البَسْكَته
شاردين كما عُـود الحطب
م الحِزمه يِندِب فُرْقِـتَه
تطبيع وديع والمُكتَسب
ربيع وروُٓده مِزَفِّـتَه
٢١- كفاية دمار بقلم إسماعيل أبو شليل
جمهورية مصر العربية
بناية الحلم عمر طويل
و هدمه أقل من لحظة
سماسرة حرب و السادة
أوامرهم يدوب لفظة
رصاصة بأرخص الأسعار
و نار و فوقيها مية نار
بأمر عصابة الأشرار
بذل نعيش يا عار و دمار
على صوت المدافع كان
وداع حلمى
يمكن عشان حلمى عظيم
فى حضن المدنة مات ع الأرض
و جرح القلب نزفه أليم
و سكنت بيتى غربان الألم و الفقر
نجوع بالشهر نشبع قهر
زمان كان الصيام له شهر
و دلوقتى بقيت صايم
أنا و عيلتى بطول الدهر
بنية و شعرها مجدول
براءتها طواها الهم
على كراسها كان مرسوم
قلوب لكن بلون من دم
و مكتوب إسم صحبتها
اللى رحلت أمس تحت الهدم
كما الأطياف يمر الحلم بخيالى
رسمته فى يوم ورود و خضار
ما كنتش أعرف إنه سراب
ما دامت عصبة الأشرار
قلوبهم خالية من وازع يناديهم
كفاية دمار!
التعليقات مغلقة.