مسابقة سيدة القصاص لشعر العامية من وحي لوحة ” لا حياة بلا انسان” للفنان غريب حسن

١- قلوب البشر مليانة خير بقلم الشاعر أسامة

قلوب البشر مليانة خير

كل البشر احنا البشر جوانا خير

قلوب البشر مليانة خير

اوعى تفرق بين البشر احسن يبقى قلبك حجر

ويموت جواك يا حبيبى الخير

قلوب البشر مليانة خير

احنا الناس البنى ادمين لازم نبقى طيبين

طول مابنبعد ااى خطر

عن يا حبيبى جميع البشر

تبقى قلوبنا فيها خير

قلوب البشر مليانة خير

يارب يسر كل عسير

واملا قلوبنا تمللى بخير

قلوب البشر مليانة خير

٢- نجلاء خليل شخابيط وجع

مش بالعدد
خليك سند
للروح وبوح
يمكن تهون الحياة
يمكن تداوى جروح
تعالي نرسم ع الطريق
بستان زهور
الحب نور
محتاج جرئ
قلبه صبور
أنا وأنت وخطوة مؤكدة
مجرى الدموع مليان حنين
لحظة لقانا قصيرة
لحظة وداعنا مستحيل
خليك كده
طوفان مشاعر زي نيل
علي ضفته
صفصافه وارفه
وف رقته
عصفوره واقفه ترتوي
بمحبته
خليك سند

٣- هي دنيا بقلم مها الخواجه مصر

للمسابقة (لا حياة بدون إنسان)

هي دنيا وقالوا فانية
ليه نعاند بعض ثانية
ما إحنا لو نفهمها بدري
تبقا لينا دنيا تانية

بالمحبة تكون جميلة
والنفوس صافية وأصيلة
مش نفوس تبدرها كره
تشعل الحرب بفتيلة

دنيا حلوة لو نسامح
مش نعاند أو نقاوح
نزرع الود ف ما بينا
نلقا بينا الحب طارح

كلمة حلوة ونفس صافية
تبقى بيها قلوبنا دافية
بالمحبة والقناعة
القليلة تبقا كافية

مهما طال العمر بيِّنَا
الفراق مكتوب علينا
إللي يفرق بس بينَّا
سيرة حلوة نفوتها لينا

٤- على فين رايحين بقلم أحمد زيدان البلياتشو – محافظة الإسكندرية

ب نفكر ديما
ف امبارح !
ب نلملم فينا
الشوق سارح !
ب نعيش جوانا
و مش راضيين !
ب نقابل روحنا
ما نعرفهاش
و الشبه
منها أربعين !
ب نحاول نهرب
من بكره
بندور فين
السكه منين
محناآش عارفين !
ب نخبي جروحنا
في ملامحنا
و بنرسم ضحكه
ب توجعنا
وياريت عاجبيين !
القطر يمشي
بينا بسرعه
و سؤال جوانا
ب يتردد
علي فين رايحين ؟

٥- (لن أعيش بدونك) بقلم على البحيرى – مصر

أنا اللى بجرى فى عروقك
ومن ذوقك
كبر شوقك مزج بالدم
ياواد اهتم
أنا الغالية أنا الباقية
أنا روحك
أنا بنتك
أنا أملك // أنا حبك
أنا جارتك من الشارع
ولونى حتى من لونك
وبنت الخال وبنت العم
يا ريت تفهم
بلاش تتسلى بأنينى
وبسـنينى
وانا اللى كنت بروازك
وصورة لكل أنفاسك
وضحكة
ضيها الماسى
بيعكس صدق إحساسك
خلاص صبح الكلام مكروه
وغاب نبض العروق والدم
وراحت فى الهوى
وعودك
وكل الخلق مش عجبك
ونازل زم
أظن خلاص حتفهمنى
وترجعلى
وتفرح بى وافرح بيك
وأغسل توبى مع توبك
وأدعيلك مسا وصباح
يزول الهم
(((واصلى معاك فى محرابك)))
وأحرس رمل أعتابك
ورش المعتدى
بالدم

٦- نص مسحور بقلم الشاعر أحمد محمد شعبان من مصر

أنا المقتول وفيكي بعيش
وعيني نورها من عينك
وليه أبحث عن الجنه
وكل الجنه تكوينك
أعيش عابد بمحرابك
يا صورة بروحي مرسومة
بعيدة وساكنه في عيوني
لأنك فيها موشومه
وبحلم أبقى قدامك
أشوفك ما قدر أتكلم
وقلبي يسهى عن نبضه
وعيني ليكي بتسلم
وأهدي للبحار دمعي
يوصلك هوى المهجور
وبلمس نبض حباته
فبعرف أنه صار مسحور
أنا نص ونسي روحه
على عتبة مساكنكم
ومين غيرك رح احكيله
وكل حروفي من عينكم
أنا السكران بلا خمرة
ومسموحلي أقيم الليل
وأمشي في الهوى تايه
أشوف سحرك في كل جميل

٧- هوية إنسان  بقلم ولاء أحمد القضاة _ الأردن

أنا الإنسان في إنسانيتي
بغربتي وعزلتي
أنا الإنسان حتى بوحدتي
برضو أنا الإنسان
بهيئتي وشكليتي
بتفكيري وعقليتي
أنا الإنسان وإن كنت نصف إنسان
إيه يعني لو بيوم انتصفت جزئيتي
إيه يعني لو بيوم رحلت عن دنيتي
ما هو برضو أنا إنسان
وحتما هيجي يوم وتضمني تربتي
أنا الإنسان وبجواري مخافة ربنا
تهديني النور وتخطفني من ظلمتي
أنا هو اللي يخطئ ويرجع يتوب
من أول وجديد
أول وتاني وتالت
واااه لو بيوم ما لحقتش أنطق توبتي
اه لو جى دا اليوم ولسى كنت تايه
بخطوتي
أنا الإنسان العاجز مهما عملت بدنيتي
أنا الفقير ليك يا ربي وإرحم زلتي
أنا المكرم بالعقل وأحيانا
يتوه مني الفكر واضطرب
هو تيه من نزوتي ولا من غفلتي
ولا إيه ولا إيه
أنا الباحث عن لقمة عيش
أسد فيها جوعي وأكبر كرشتي
أنا العابر على وجودي
وطين أصل منه كانت خلقتي
نسيت بيوم إني تراب
واني حتما هاعيش بتربتي
أصل دا حق ولا بد منه
متل ما جيت حاختفي
في يوم كانت بدايتي
طفل منتظر وصراخ حنين
يد حنونه متعطشه
على طفلها تحنن
جمع كبير يهني بقدومي
وأبوي يكبر بأذاني
ويبتسم
كل همهم إسمي وهويتي
والشقا والشوق بتربيتي
وكانت دي بدايتي
في يوم صدرت شهادة ولادتي
كبرت وعرفت ايه معنى حياة
يا حياتي
كبرت كتير وعجزت قبل أواني
شفت الشمس تغرب مع اول
زقزقة طير
وشفت القمر بحقيقته مظلم
متل الليل
وفيه نجوم كتيره اوي
تستجدي الطريق
شفت إن ثمن الحرية كبير
ومش الكل يقدر عليه
شفت الحر كان حر بس
لأنه مش في قفص كبير
بحجم خيبته
شفت كتير وعانيت كتير
حكيت كتير وصمت كتير
وأديني بمارس الصمت حكاية
واكتب عجز الكلام برواية
الكلام بليغ والصمت أبلغ
والصم كتير والعميان كتير
اللي فاقد بصيرته ضرير
و اللي صم دانه عن الحق أصم
عامل نفسه مقتنع بسذاجته
بضعفه رغم قوته
كفايه بقى تعبت خلاص
دا الإنسان بحر ما ينضبش
لكنه بالحقيقة إسم إنسان
يعتدل هنا ،، يخبط هناك
يصدق هنا ،، يكذب هناك
يجمع هنا ،،، يفرق هناك
إنسان هنا ،،، وهنا مش إنسان
صريح وغامض
أمين وخائن
أنثى وذكر
وايه كمان من صفات الإنسان
ذكروني يمكن انا برضوا نصف إنسان
لا بدّ من يوم يبكوا علي متل
ما في يوم فرحتهم
لا بدّ بيوم يحزنوا
على بدايتي ونهايتي
ما هو برضو أنا إنسان
لا بدّ في يوم تنتهي رحلتي
وانا وضميري ابتدي دنيتي
الجديدة
في عالم تاني ما فيهوش
فرق بين الإنسان والإنسان
هناك عند ربنا تكون أبديتي
يا ترى فعلت إيه لأخرتي
فجرت وتبت
وعدت فجرت وتبت
اهو أنا الإنسان
خطاء وتواب
طامع بكرم ربنا
يغفر ذنوبي
لكنه إيه مصيري لو ما لحقتش
أتوب
أنا الإنسان إبن الإنسان
وها يجي يوم أكون نسيان
يذكروني مره ومرتين
وبعدها يمكن خلاص
ويمكن يبقوا يذكروني
لكن بوقتها أنا إنسان
ميت مش بيحكي
ولا بيتكلم
يمكن يزوروا تربتي
ويمكن ينسوا المكان
أنا الإنسان ودا ماهوش
الإ جزء بسيط من الإنسان
وابقى إجري يا إبن آدم وحواء
جري الوحوش
وما هتطولش الا اللي مكتوبلك
من حبة دقيق للماكنتوش
إجري يا أبن آدم جري الوحوش
واياك وإنت تجري تنهشك الوحوش

٨- صباح مبسوط بقلم هنا سعد مصر

صباح شارب من نيلى
وبيغني مواويلي
ويقول الصبر؛ نتصبّر
ومن بعد عود
اخضر ؛
هيبقى قد الكون
—————————
صباح مبسوط
على حاله
وبيغنيله مواله
ويقول للشمس
أنا راضى
مليان بالخير
ومش فاضى
أعد نجوم
———————————
صباح الخير على الجيرة
صباح الود يا أصيلة
يا بنت عمارتى
وشبابيكى
أنادى عليكى
لما الدنيا تغلبنى
ألاقيكى
تحنّى عليا تراضينى
واراضيكى
ولما كبرتى بداديكى
واموت فيكى
——————————
صباح سكر بيغنى وبيرقص
صباح أحمد أخو مرقس
صباح الفجر وقرآنه
اللى بيطمن
صباح صلواته فى كنيسه
ولربه بيتحنن
صباح محبة
وحضن أمان
صباح يجمعنا
فى كل مكان
—————————-
صباح مجدول بمشاعرنا
صباح بيحللى أيامنا
ينور كل ليالينا
ويرسم كل خطاوينا
بلون الشمس
مبسوطة
ولون نيلنا

٩-رسمتك لفين بقلم منى الشوربجىم

رسمك لفين ياأفندى
والخطوة بيك على فين
ضيعت عمرك مهدى
وف التحدى امين
قلبك فى ليل الدجى
غنى مواويله
ميل عليه الاسى
وهمس له غنيله
لفين وخداك الحياة
وسايبنا نتكدر
رق ف ضلوع الشجن
وعمرنا قصير
ان كنت ناوى الموت
طب سيبلنا كلمة
اصل الحياة والموت
متجمعة ف كلمة
ومفيش حياة فى الكون
الا ومربوطة
لا خيط ولا سلسلة
واهى ماشية بالاحسان
لازم تكون أدها
ارجوك .. كون انسان

١٠- مات الضمير بقلم شيماء عادل

سقطت جميع أقنعة الحياة
رفضت تواجه كدب عشاقها
الارض رغم أنها طاهره
بطبيعة الخلاق
كل العوامل غيرت روحها
والزيف ملاها من النجاسه كاسات
لفيت بعيني على الحياة
مالقيتش منها غير بواقي نفاق
معجون بغلب الطيبين فيها
أملي البسيط أصبح بلا وجدان
موته رغم اني عايش فيها
كل الظروف عاكستني رغم الحب
كل الساعات بتعدي مجبوره
لفت عقارب نبضها الميت
بتوه ف كادر الحياه وزيفها
الكدب كيفها
وانا لسه بتأنا
باصص على وشوش الخلايق كلها
معدومة روحهم من سنين
الهم شيب قلبهم
نسيوا الحياة دي تبقي مين
انا من سكات
لملمت روحي دفنتها
وعجنت من غصن الهوا
كفن السنين
ماتت ملامحي الطيبة
وهعيش لمين؟
طول ما الحياة من غير بشر
زاد الوجع فيها انتشر
حول معاني الحب
لكلام على الورق
يا سنين ضعاف
الكل مات ف الدنيا
قبل ما يتخلق
سرسب حياتنا لحضن اوجاع من سكات
الكل مات
واتبقي منا صرختين
حاملين على جبينهم وجع
ماااااات الضمير
شيماء عادل
جمهورية مصر العربية
ببا_بني سويف
لا حياة بلا انسان
خاص بالمسابقه

١١- اضحكي للدنيا بقلم نهى بدوية – مصر

اضحكي وافرحي
غني وغردي
واخرجي للدنيا وحلاوتها
ده العمر ساعات
والوقت اهو فات
واحنا ع الحال ده في سكتها
ما بلاها الام
وكفايه كلام
وهمومنا خلاص هنسكتها
نزعل على ايه
وحنحزن ليه
واحنا ع الدنيا مفارقينها
كلها أيام
بتعدي قوام
ومسيرنا في يوم كده سايبينها
ولا قولة اه
ولا جرح معاه
هتبدل حالها وتعدلها
ده الحزن غريب
وملهش طبيب
في الدنيا يضيع حلاوتها
والفرحه عشان
تمحي الاحزان
اضحك للدنيا وجننها

Reehan Alkamary

خاص بالمسابقه
شعر / اضحكي للدنيا
بقلم / نهى بدويه

١٢- ليه يا زمان بقلم فيصل الحوري – الأردن

ليه يا زمان
ما سبتناش ابرياء
احنا خلقنا ربنا
من غير هموم
ابرياء كنا
على طول المدى
نغني سوا
نلعب سوا
ومرتاحين
فوق السما
ومبسوطين
وايا الهنا
من غير الم
نسهر على
ضي القمر
من غير خطر
كان الامن
كان الامان
كنا نكلم بعضنا
من غير هواتف
او موبايل
ولعبت فينا
يا زمن
خليتنا نعزف
على الوتر
لحن المحن
في دروبنا
همسة ندم
في قلوبنا
جرح والم
في كل نبضة
نسمعك
نسمع كلامك
نكرهك
في كل دمعة
تحيرت
في عيون
غوالي
تجمدت
وعيون حزينة
سافرت
وتألمت
وآه منك يا زمن
لما تروح
وتنسانا
ولا تسأل
لدنيانا
آه يازمن
لما بتخدعنا
ولا تترك لنا
حتى ولو بسمة أمل

بقلمي فيصل الحوري الأردن

١٣- قرب بقلم محمود ابو راشد

قرب تلاقي الخير
بيطرق بابك
قرب تلاقي
ناس كتير احبابك
عمال بتبعد ليه
متفتح بابك
قرب دي هيه
الوحده سر عذابك

سلم تلاقي سلام
وكلام تلاقي كلام

لو انت رايح فين
هتلاقي ناس قدامك

مد اديك للناس
وابعد عن الوسواس

دا اللي لوحده انداس
وبلاش تبيع اصحابك

مفيش واحد وحده
هيعيش كدا لوحده وربنا لوحده
هو اللي يصلح حالك

فكر كتير في كلامي
لو كنت هتفكر
والله مبهزر
الدنيا مش ديمالك

١٤- قصيدة نيران حبك بقلم الشاعر مسعد خلاف
مصر – طنطا

نيران هجرك لما
تزيد نيران قلبي
اوي لحلم وليد
موء مل في غد
يبدي نهاري سعيدا
وان أرى الابتسامه
تهدي لعمري امانه
تهدي لقلبي سلامه
فالتفرحي غادتي
فاتلكَما غايتي
حتى أرى غصن بإن
معطرا بالحنان
وهناك تحلو الحياة
ويستعيد الضعيف
مع الليالي قواه
وبالسعادة نمشي
ابث حبي وعشقي
اطفيئ نيران شوقي
فمن لقلبي
سووووواااااه

١٥- كل مكان بقلم د. هبة صبحى البدوى

غَرييييب عَ الدُّنيا
تايِهْ بِين شوارِعْهَا
مِشِيت هَيّمان
وما لِى فِيها بِيت
مَالِيش عِنْوان

ما بِين الصخر والْمَيَّة
رَمِيت جِدْرِى
دَفَنْتُهْ بعييييييييد
فَثَبِتْنى
ومَسْمَرْنى
بِأراضِيها
أوى وعتييييد

فروعى لِفوق
عِشْقْهَا النور
هَواهَا الرِّيح
وخَدها بعييييييييد

بلابِل بلدى تِآنِسْنى
بِتِطْرِبنى
وتِشجينى
و يوم ما ارحل تِرَجَعنى
وتُحرُسنى
حَنينى إِليهَا يِجْذِبْني
وَلا يسِيبني
أتوه واهْجُر

ِِلِأَىّ مكان

مَلامْحى طابْعة فِ صْخورها
وِ منحوتة
حُروف إِسْمِى على الجُدران
وسِيرْتى فِيها مكتوبة
ومَقرِيَّة
ومَحكِيَّة
وكِيف بقا تِبقى منسيَّة ؟
ودِى سارْيَة مع الميَّة
ترُش عبيييير أزاهيرى

فِ كل مكان

وِيِرْوِى الطِّير لحَكاوِيَّا
يِسَطّرها
يِبَخّرها
نسيمْها عِطرُه لُه ألوان
عَصِى مِن يُومُه عَ النِسْيان

وِلَوّ دفنونى فِ تْرابها
يِعيش ناسى
يِمِدّوا الجِدّر فِ تْرابِك
وِيِسْكُن طِيرى فِ عْشاشِك
وِيِسْقوا زْهورى مِن كاسِك
يِتُوه طِيفى مابِين ناسِك
وِوَلَدِى العابِد النّاسِك
هَيِذْكُرْنٍى
وِيِدْعِيلى
وِ تانى هَعود وِمالى بِيت وَلا عِنوان
لأنّى جُوَّه كُل ذَرة فِ تْرابِك
مكانى فِيكى …. كل مكان.

١٦-كل اللي راح بقلم فايزةأحمدالمياني

كل اللي راح
في بعادي عنك … كوم جراح
و الطرح شوك … زهزه و فاح
أنا كنت شارى
و أرض حلمي كات براح
لكن ايديا قصيرة
و العين بصيرة … مصبرة
و دموع بتكوي
في العيون قبل الخدود
دمع المذلة مكمرة
و الحوجة زي الخمرة
هاريه ف جوف سنيني… معتقة
لابدة في وريدي
رافضة هجري … مصدرة
……….
قلبي اللي بات مدبوح
ب يصرخ للصباح
مل الهداية … و السماح
و الكفر بيكي صار متاح
و العشرة فانية
بدون تمن
برواز قديم ع الحيطة
مايل
والحظ زيه طاش و خاب
لا قدرت اشيلهبْدون سبب و لا أغيره وتقيله شيلتي ..

تور وداير ولسه إيدي مسمرة ……….

و مشيت بعيد حافظ ملامحك و انت قدامي القمر صوت ضحكتك كان لي السمر …

وقت السهر دلوقتي بوم…

عمال بينهش جتتي و ف غربتي كل الأماكن …

حاملة طيفك كل الجراح …

بنصل سيفك كل الشوارع …

راسمة خوفك حتى القمر …

وارث كسوفك فانتحر ……….

كل الخلايق من ملامحك كل الكلام مبقاش مسامحك

عمال بيجلد في الأمل

و العمر يرمح بالقوي…

و لا ليش سند أنا منتهي من غير هدد
ما انا لما سبت هواكي مجبر
و فْ وقت غيبتك قولت اكبر
بكرة تتعدل و ادبر
و بألف ميت مليون جنيه
أرجع ألاقي الحلوة أحلى
و هي كانت فكرة سهلة
بس بعدك و الزمن
خلى الليالي البيضة وحلة
……….
و رجعت ويا شوال فلوس
و الضحكة فيا اتبددت
على الملامح و الوشوش
حتى النفوس … مش دي النفوس
لو ولعوا مليون فانوس
روحي بِهتِت و اتمحت
و القلب تاه
في كُم بدلة بكام جنيه
فَ كتير قليل … مش مهم
لكن المهم إني اتغابيت
ما أنا اتنسيت
كدة ضعتي مني ؟ …
و روحي عندك _ ترتجي _
واقفة على اعْتابك … مريدة
مفرهدة
سقطت و دابت م السنين
و اما أرتإيتك
قلبي رفرف و اتنفض
ما هي روحي ردت في الجسد
لكن عيونك جمر نار
و عليها روحي بتتصلب
من بصتي في قلبك لاقيت
غابت ملامحي و اتمحت
غامت مرايتي ف نن عينك
حتى صورتي اتغيرت
ماعرفتنيش … و ما شفتنيش
و سألتي : مين ؟!
_ ساكتة _ بتحكي طلتك !
ف ساعتها بس
حسيت بموتي من جديد
جلادي كان هو السكوت
فهربت منك مرتين
و السوط بيشرخ في الحديد
و الصوت على لساني
اتعدم
مافضلشي غير قهر و ندم
متجمعين زي الصديد !

١٧- بدون انسان بقلم الشاعر المصري أحمد إبراهيم النجار جمهورية مصر العربية

بدون إنسان هتمشي الدنيا بالمقلوب
تاريخ مشطوب
وليل معطوب
ووجه قبيح
بدون انسان
يموت الخير ويهجر طير
وتسكن صرخة ع الرصفان
يتيم بيئن م الأوجاع
وطفل جعان
وام بتبكي م الأحزان
وأيد قاسية وناس ماشية
بدون إحساس بدون إنسان
يعيش الليل على الأحلام
تطول أيام دموع عريان
وجسده نحيف فقير وضعيف
بيبكي أنين من الأيام
ياطول الليل بلا رحمة
وبرد شديد
وناس تايهين وف الزحمة
بتصرخ ويل
وناس سامعين
ولا حاسين فضا مليان
بنااااااس وكتير لكن عايشين
ومش عايشين في حضن حياه
بدون انسان حياه باهته
وطعم اجاج وبحر غريق
وريح بتصيب جسد واقع
في وسط حريق
في ليل جاحد مطر فى دموع
ويصرخ جوع فى بطن بريئ
وحيد بيموت في بحر غريق
بلا شطأن تدور الأرض
تتمايل وتترنح
ويعلى الصوت فى صمت الليل
وناس جايين
وناس م الدنيا بتروّح
وكسرت نفس مغلوبه
ودمع ف عينها ويسلّم
على الأحزان
يعيش القلب متجرّح
كأني الدنيا مش دنيا
ولا فيها فى يوم احساس
ولا فرحة بتحيّ حياه
بدون انسان حياه ضايعه
وغابة ناس وعايشنها
ضعيف بيموت
وصوت الأقوى
ده فيها بظلم جحود
يا جرح الصمت يا عالى
فى نبض حياه
ولا حياه بدون انسان
يكون حساس بقلب رحيم
وأيد بالطيبه واطبطب
وتمسح دمع وتجمع فرح
للمحتاج وتمسك شمع
وتمحي الليل
بنور الرحمة والبسمه
يكون الدنيا عنوانها
لا حياه بدون انسان
لا حياه بدون انسان

١٨- اه يازمن بقلم عزبزة السالمي – تونس الخضراء

لو كنت بفكر فيك
كنت عرفت ناس مابتؤذنيش
كنت عشت في أمان وحسيت
ولو حتى يوم أعيش فيه
مرتاحة نفسي
مرتاحة ضمير
لكن القدر غير الطريق
وانا ماعرفتش عنواني
أو حتى اسمي ومكاني
اه يازمن انكتب علينا القدر
انكتب علينا العذاب والغدر
لكن الدنيا ديا فيها ناس
بتحب الأذية لناس تتعذب للأبدية
اه يازمن قست قلوبنا
بكت عيوننا
واحنا مارحمنا وماتوبنا
نتكلم ونحكي عن ناس
كلام ٱسي من قلوبنا
يقطع القلب وينزف الروح
اه يازمن لو كنت بفكر فيك
كنت عرفت ناس مابتؤذنيش
كنت عشت في أمان وحسيت
ولو حتى يوم أعيش فيه
مرتاحة نفسي
مرتاحة ضمير
اااا … يازمن

١٩- ارسم وابدع يا فنان بقلم/احمد يوسف سليم
جمهورية مصر العربية

ارسم وابدع يا فنان
لا حياه بدون انسان
ارسم شجره وبيت
فلاح شغال فى الغيط
تلميذ ومدرسه واستاذ
مهندس بترول بينقب ع غاز
عالم وطبيب بيداوي
كاتب وشاعر مالي
حياتنا فرح غناوي
عسكري حارس بتنا
وجندي واقف علي الحدود
شيخ بيحل مشاكل حارتنا
تفاح طارح ع الخدود
عامل وموظف شقيان
ايد بطبطب مليانه حنان
أرسم بطول والعرض
في الشرق وفي الغرب
إنسان يعمر أرض
وفارس يصون العرض
ارسم كنيسه وجامع
صوت جرس مع أذان
أصرخ للي مش سامع
لا حياة بدون إنسان

٢٠-أنا انسان بقلم علي قاسم – مصر

لا حياة بدون إنسان
كان منبع لكل حنان
دا في حضنه لقينا أمان
وبنينا معاه أحلااام
ومشينا معاه أزمان
كان همه يكون إنسان

لا حياة بدون إنسان
في وجوده الحياة ألوان
والضحكه ف وجه جنان
يعزفها كما الألحاااان
ينقشها بايد فنااااان
والله في غيابه جعان
للكلمة وراحة البال
للنظرة في توب عنوان

لا حياة بدون إنسان
بصماته في كل مكان
لصحابه سند وأمان
وفي الشدة حجر صوان
لجرانه ورود وريحان
أسلوبه كتاب يا زمان
عنوانه أنا إنسان

٢١- “في وشوش الناس”
شعر أسامه نور – مصر

أنا عايش
وأحلامي بتتحقق
وصورتي…..
في وشوش الناس
أنا شيفك وشيفاني
أنا عايش فِ كل كتاب
وتاريخك مزيني
بعقد اللولي والمرجانْ
أنا دمي شجر أخضر
وزهر بيطرح المرمر
وعيني تْبات على ألمك
وجسمي درعك الحامي
وبفرح لما تبتسمي
وقلبك لما يفتح لي
يبص كتير على صورتي
وتحكي لي عن اللي كان
ولحظةدمعك السايل
ودمي الجاري يتقبلوا
فيتعاتبوا….
ودابت بينهم الأجضان
أنا المشتاق لحضن طويل
أنا المشتاق
لآخر كلمه قولتيها
لآخر نظره في عيونك
وإيدك لما تدعي لي
بكل سلام
وسامع نبضها الكلمه
مترجعليش بغير بكره
وانا عَ الوعد
مش هبكي
ولا هنزف عليك صبري
ولا هصرغ في عز الليل
بصوت مكتوم كما البركان
ولا دمعي يبات يجري
على غصني
اللي راح مني
حلمت انك تكون شجره
تضلل لي على بابي
تكون سندي وعكازي
وأوراقها تغطيني
في ليل البرد
وتحميني في عز الحر
وبدعي لك
بإن تكون فِ أول صف
وإنك تكسر الضلمه
لآخر حد
وإنك تدخل الجنه
بقلب جرئ
ميعرفش سواه الحق
أنا المجروحه لكني
حلمت انك تكون بطلي
وإن الموت يخاف منك
عذابي فْ دنيتي
لكن خلاصي لما نتقابل
في يوم العرض
وهستنى تعديني
بحور الضوء
وترفعني لجنة خلد
فكل الموتى أرواحْهم بتستناك…
بيتساءْلوا عن الآتي
بسرب حمام
وعن سر النسيم فايح
وسر الرحمه نزللهم
وعن جمع المليكه اللي
بيكتب في دفاتره حساب
ميخلصشي دوام الدهر
وعن دمك على هدومك
وعن سر السلاح
ضمه إلى صدرك
وطلقةغدر من خاين
بتتحامي في قلب جرئ
ورفضه إنها تخرج
وعن لحدك يشع الضوء
وطينْته المسك والعنبر
وفرشه السندس الأخضر
أنا شايف ملايكه كتير
في يوم فرحي بتضحك لي
وحور العين بتتسابق
وبتقول لي
بقى لْنا كتير بنستناك
تعالى لجنه بتحبك
بقت خلدك…بقت مثواك
فيا أمي بتبكي ليه؟
أنا جنبك…أنا شيفك
أنا الحي الوحيد ديمًا
وما دوني هم الأموات

٢٢-حالك عجيب محمد عبده – مصر

قالولى اكتب عن الحياه، قلت الحياه ديّه غريبه
لا ليها قاعده ولا عدله، معادله صعبه وعجيبه
مخلوقه للإنسان مخصوص، ورغم ده مطحون فيها
عايش يعافر ويكافح، لاجل انه يقدر يراضيها
لا هو عايش على راحته،
ولا منّه قادر يسابقها، ولا حتى عارف يجاريها

بيلف جوه دايرتها، تايه تملّى فى سكتها
وبرغم تعبه وبهْدلته، ماسك ومِتعلّق فيها
لا هو راحم فيها نفسه، ولا هى رحماه وتملّى،
وخداه يا عينى على حاميها

عجيبه يا دنيا وعجبى، جاذبانا ليكى وبتْشدّى
ولا فرصه تدينا نهدّى، ولا حتى بشويش تاخدينا
مخلوقه علشان نتراضى، ونعيش حياتنا ببراءه
لا مره بتراضى قلوبنا، ولا مره عمرك واسيتينا
حقيقى مش فاهمه حقيقتك؟!!، ولا انتى قاصده تعاندينا
من غيرنا ما لكيش أى لزوم، إحنا اللى عاملين لك قيمه

أما انتى يا لوحة الفنان، فكل ما فيكى عجبنى
بتجسدى وصف الإنسان وكإن مستوحاه منى
دى صوره من بره لإنسان، وجوه دنيا بتشبهنى
كل اما ابص القى عيونها، ماليهم حزن من حزنى
حالى عجيب فى الدنيا دى، لا عاجبه ولا هو عاجبنى
تعبان ويوم عن يوم عن يوم، تقسى عليا وتظلمنى
تساع كل اللى ساكنينها، وحالفه عليا ما تسعنى
برغم وسعها وبراحها، بتضيق عليا وتهجرنى